Paris, Lber:
U President ka France, U Emmanuel Macron, u la ïathuh ha ki nongthoh khubor ba u la kyntu ïa u Myntri Rangbah duh jong ka Israel, u Benjamin Netanyahu, ha ka sngi thohdieng, ba un “kiar na ka jinghiar thma ha madan” ha Lebanon, ha ka phone call ba nyngkong jong ki, naduh ka lyiur ba la dep.
“Nga la khot ïa u Myntri Rangbahduh jong ka Israel, ba un pynneh pynsah ïa ka jinglong trai jaka jong ka Lebanon bad ban kiar na kano kano ka thma ne jingïakynad bad ki,” ong u Macron ha ka rynsan ‘X’, hadien ba ki shipai Israel, ki la rung sha ki katto katne ki shnong khappud bad ki shnong kiba don ha ka bynta ba shathie jong ka Lebanon.
Ka Lebanon, kaba dei ka ri barim jong ka ri France, ka la shah ring sha ka thma Middle East ha ka sngi Nyngkong, haba ka kynhun lehnoh Hezbollah, kaba la kyrshan da ka Iran, ka la hiar thma ïa ka Israel, kum ka jingkynthoh halor ka jingïap jong u nongïalam ba hakhlieh duh jong ka Iran, u Ayatollah Ali Khamenei, ha ki jinghiar thma jong ka US bad ka Israel, ha ka sngi kut taiew.
U President ka France u la ong ba u la ïakren ruh bad u President ka Lebanon, u Joseph Aoun bad u Myntri Rangbahduh ka ri, u Nawaf Salam, ha kaba u la ban jur ïa ka jingdonkam ïa ka Hezbollah “ban sangeh shisyndon ïa ki jinghiar thma jong ka pyrshah ïa ka Israel bad shabar jong ka”.
Hynrei, la ong ba ka jingïadei hapdeng u Macron bad u Netanyahu, ka la nang sniew ha ka lyiur ba la dep, hadien ba une u nongïalam jong ka France, ula pynbna ïa ka jingthmu jong ka France, ban ithuh ïa ka jinglong ri jong ka Palestine.
Ka France ka la ithuh thikna ïa kawei ka ri Palestine ha kaba kut jong u bnai Naiwieng, shwa ba ka jingsangeh thma kaba tlot kan sdang ha ka thaiñ Gaza ha u bnai uba bud.
Ha ka shithi kaba la phah ha ka shiteng Nailar, u Netanyahu u la ujor ba ka jingthmu jong ka France ban ithuh ia ka ri Palestine ka pynmih ia ka jingpyrshah ia ki Jiw — ha kaba u Macron u la jubab ba ka jingiakhun pyrshah ia ki Jiw kam dei ban long da ki tiar ialeh.
U Myntri kam bar ri jong ka Israel, u Gideon Saar, u la ong ha kaba sdang jong u bnai September ba ka sorkar jong u kan nym mynjur ïa ka jingwan jngoh jong u Macron katba ka Paris ka dang thmu ban ithuh ïa ka ri jong ka Palestine.
