New Delhi, Lber:
U Myntri Rangbah ka Telangana, u Revanth Reddy, ha ka sngi Balang, u la ïakynduh ïa u Myntri ka tnat ki kam pohïing jong ka sorkar pdeng, u Amit Shah, ha ka nongbah jong ka ri bad pan bhah shuh shuh na ka bynta ki ophisar jong ka Indian Police Service (IPS) na ka bynta kane ka jylla.
Ha kane ka jingïakynduh, u Myntri Rangbah u la ong ba ka jingdonkam pulit jong ka Telangana ka la kiew bha bad donkam ïa u IPS uba kham khlaiñ.
U la kdew ba ïa ka jingbishar bniah ïa ki nongtrei ba nyngkong hadien ba la thaw ïa ka jylla la pynlong ha u snem 2016.
Ka jingbishar bniah kaba bud, kaba dei ban long ha u snem 2021, ka la sahteng bad khatduh la pyndep ha u snem 2025. Hynrei tang hynñiew ngut ki ophisar IPS ba la pyndap la ai jingbit.
U Revanth Reddy u la kyntu ïa ka sorkar pdeng ban pynkiew ïa ka bor jong ki IPS ba la ai jingbit ha Telangana na kaba don mynta 83 ngut sha ka 105 ngut.
U la kyrpad ruh ban pynlong ïa ka Third Cadre Review kumba la buh por ha u snem 2026 khlem da pynslem shuh.
U Myntri Rangbah u la ong ba ka Telangana, kumba long kiwei pat ki ri, ka ïakynduh ïa ki jingeh ha ka liang ka jingshngaiñ jong ka juk thymmai kum ki kam runar ha ka Cyber, ka jingkhaïi drok bad ki kam runar ba la buh ha ka thup kum ki kam ba pyrshah.
U la kdew ruh ïa ka jingjur ka jingpynbor ha ka liang ka synshar khadar na ka daw jong ka jingpynbeit thymmai ïa ka Hyderabad, Cyberabad bad Malkajgiri Police Commissionerate; ka jingthmu jong ka Komishon jong ka nongbah ha ka lawei; bad ka jingkiew ka jingbun briew ha Hyderabad.
Ha kane ka jingïalang la ïakren ruh halor ka jingwan pyndem wait jong ki Maoist bad ka jingpynbha pat ïa ki.
U Revanth Reddy u la pyntip ïa u Myntri ka tnat ki kam pohïing jong ka sorkar pdeng ba ki kam pulit ha ka jylla ki la kham kiew ha kine ki ar snem ba la leit.
U la ong ba 591 ngut ki Maoist ki la pyndem bad pynïasoh sha ka jingim kaba bha ha kane ka por.
Katkum ka jingong jong u Myntri Rangbah, katto katne ngut ki heh nongïalam jong ka kynhun Maoist dang shen ki la pyndem, bad ka sorkar jylla ka ai bai lutksan bad jingkyrshan ban pynbha pat katkum ki kyndon jong ka polisi.
U Revanth Reddy u la pan jingïarap pisa ruh na ka sorkar pdeng na ka bynta ki kam pynroi ha ki thaiñ kiba dang sahdien ha Telangana.
Ha kane ka jingïalang la ïadonlang u Principal Secretary sha u Myntri Rangbah u V. Seshadri, Director General of Police B. Shivdhar Reddy, Intelligence Additional DGP Vijay Kumar bad u SIB IGP B. Sumathi.
