Shillong, Lber 05
U Bah Moslander Marngar uba dei u Chairman ka Meghalaya Commercial Truck Owners and Drivers Association (MCTODA) u la ïathuh ba ki nongñiah trok na rilum Jaiñtia unit kim pdiang ban pynïapher jaidbynriew hapdeng u Khasi bad Jaiñtia namar haba khatduh jynjar u rit u ria.
U Bah Moslander u la ïathuh ba kane ka jingbym sngewïahap ban phiah jaidbynriew ka dei ba la pynpaw da ki nongñiah trok Jaiñtia unit kaba ki la pynlong jingïalang mynha ka 4 tarik mynta u bnai.
U la ong ba ki dkhot MCTODA kim kwah ban wanrah ïa ka jingïapher jaidbynriew namar haba khatduh uba jynjar dei ki rit ki ria kiba bylla jakpoh katba ki heh ki hain kim khuslai namar ki don la ki nongïada.
U la ong ba bunsien ki nongñiah trok lada shah kynroi ym don ba ïarap ïa ki hynrei lada kum ka jaidbynriew ki ïatylli ki suk haba ki leit ki wan na kawei ka district sha kawei pat.
U Bah Moslander u la ïathuh ba ka jingïalang ka MCTODA ha Jaiñtia ka long ban ïakren shibun tylli ki mat namar ki nongñiah trok ki shah ñion beiñ.
U la ong ba ki nongñiah trok kiba ïasoh bad ka association ki don palat 3 hajar tylli tam ki kali.
U la ïathuh ba ki nongñiah trok ki dang shah ñion ha ki kompeni dewbilat namar ki aidaw ba kim don dewbilat ban kit tangba ïa ki trok ki kompeni ba ïateh bad ki, ki leit beit man ka sngi.
U la pyntip ruh ba nalor bym ïoh ban kit dewbilat, ki shah ñion ha ka dor hynrei da ka jingïatylli ki nongñiah trok, ka pynlong ïa ki kompeni ban sngap ïa ka jingud jong ki.
