Shillong, Lber 05
U Nongïalam ka United Democratic Party (UDP) Bah Paul Lyngdoh u la ong ba um kwah satia ban ïakhun ïa ka ilekshon MP shiteng samoi ka ban sa long shen, kaba la donkam namar ka jingkhlad noh jong u MP, u Dr Ricky AJ Syngkon, ha ka 19 tarik Rym-phang.
Haba kren sha ki nongthoh khubor, u Bah Paul uba dei ruh u MLA ka West Shillong u la ong, um kwah ban ïakhun ïa katei ka ilekshon namar ka jingphai khmat jong u mynta ka dei ïa ka Jylla.
“Em. Nga la pynleit jingmut pura ha ka saiñ pyrthei jong ka jylla namar ba ka don bun kiei-kiei kiba dei ban leh hapoh ka jylla. Ka don ka jingduna jong ki nongïalam kiba tbit hapoh ka jylla. Kumta ka jingphai khmat jong nga baroh kawei ha kane ka por ka long hapoh u pud u sam jong ka jylla Meghalaya”, la ong u Bah Paul.
Ka seng, u la kdew, ka don ïa ki nongïalam kiba tbit, hynrei u kwah ban pyndep ïa ka samoi treikam kaba pura hadien ba ka la ïaid shiteng lynti.
“Ngi dang shu ïaid lait ar snem shiteng na ka jinglong dkhot hapoh ka ïingdorbar kaba mynta. Nga kwah ban pynthikna ba ngan pyndep ïa kane ka samoi ha ka jinghun ym tang ïa ki nongjied ka West Shillong hynrei wat ïa ka jylla ruh”, u la bynrap.
Haba kylli hato un pdiang ne em ïa ka jingkyrpad jong ka seng ban ïakhun ïa ka shuki Lok Sabha, u la jubab, “Ngan kyntait da ka jingsbun ïa kum kane ka jingkyrpad.”
Haba ïadei halor ka ilekshon GHADC, u Bah Paul u la ong ba ka UDP kam pat ïakynduh ban shim ïa kano kano ka rai halor kane.
“Kumba la kdew da u General Secretary, haduh mynta ngim pat shim kano-kano ka rai. Ngam pat don jingtip namar ba kum ka seng haduh mynta ym pat ïakynduh.”
