Chennai, Lber:
U Myntri Rangbah ka jylla Tamil Nadu u MK Stalin u la plie ïa ki projek pynroi kiba la kot sha ka T.147.68 klur ha Salem lyngba ka jingïakren ha ka durkhih ha ka sngi Balang.
Kane ka projek kaba heh ka kynthup ïa ka ïing jong ka kolej na ka bynta ki Nurse ba la shna thymmai ryngkat bad ka Hostel ha ka Hospital jong ka Sorkar Mohan Kumaramangalam Medical College, ba la tei ha ka jinglut kaba T. 31.08 klur.
Kane ka jingtei jong ka kolej ka don lai tylli ki kamra klas, hynriew tylli ki Laboratory, kawei ka Library, kawei ka kamra audio-visual bad kawei ka kamra Computer Lab.
Kane ka Hostel ka don 100 tylli ki kamra bad ka lah ban pdiang 300 ngut ki samla pule. Hapoh ka tnat Municipal Administration and Water Supply (MAWS) la plie ïa ki katto katne ki projek hapoh u pud u sam jong ka korporashon Salem.
Ïa ka pung Mookaneri kaba la pynthymmai kaba don ha ka Hasthampatti zone la plie biang hadien ba la pyndep ïa ki jingtrei ha ka jinglut kaba T.23 klur.
La plie ïa kawei ka park thymmai ha ka Ammapet zone ha ka jinglut kaba T. 3.22 klur. Ïa ki jingtrei ban pynthymmai ïa ka pung Bodinaickenpatti ha Suramangalam zone la pyndep ha ka jinglut kaba T.19 klur, bad ïa ka surok bam hajan ka pung Pallapatti la pynroi ha ka jinglut kaba T.3 klur. U Stalin u la plie ruh ïa ka Chief Minister’s Creative Centre kaba thymmai hajan ka New Bus Stand, kaba la shna ha ka dor kaba T.99 lak.
La pynlong bad pyndep ruh ïa ki projek pynroi ha ki Municipality. Ha Mettur, la tei ïa ka jaka khaïi thymmai ha ka dor kaba T. 3.53 klur bad ïa ka jaka kha khun jong ki mrad ha ka jinglut kaba T. 65 lak. Ha Tharamangalam, la tei ïa ka jaka pynïap mrad kaba mynta ha ka jinglut kaba T.53 lak bad ïa ka jaka khaïi pateng ha ka jinglut kaba T.55 lak.
Ha Narasingapuram, la pynheh ïa kawei ka park ha Arangabala Nagar ha ka jinglut kaba T.46 lak.
Hapoh ka skhim AMRUT 2.0 la pyndep ïa ki projek um dih ha Jalagandapuram ha ka jinglut kaba T.14.4 klur, ha Gangavalli da T.18.89 klur bad ha Thodavur ha ka jinglut kaba T.10.70 klur. La tei ïa ki ïing ophis jong ka Town panchayat ha Poolampatti, Yethapur, Kolathur bad Thodavur ha ka jinglut baroh kaba la kot sha ka T.4.58 klur. La buh ruh ïa ka ïew kaba man ka ïew ha Ayothiyapattinam ha ka jinglut kaba T. 1.59 klur.
La tei ïa ka jaka ai jingïarap ïa ki nongtrei ha ka jinglut kaba T. 41 lak. Kiwei pat ki projek ki long ka Police Canteen ha ka jinglut kaba 1 klur tyngka, ka madan ïalehkai para sports ha ka jinglut ba 1 klur tyngka, ka Mini stadium ha ka jinglut ba T. 2.5 klur ha Attur, ka ophis tahsildar ha ka jinglut ba T.4.54 klur ha Thalaivasal bad ki Staff Quarters ha ka jinglut ba 41 lak tyngka.
Hadien ka jingplie paidbah, u Myntri ka tnat ki kam jngohkai pyrthei u R Rajendran u la leit ban jurip ïa ka pung Mookaneri.
Ha kane ka sngi la don lang u MP ka Loksabha u TM Selvaganapathy, u Collector u R Brindha Devi, u Corporation Commissioner u M Elangovan, bad kiwei kiwei ki heh ki haiñ.
