Delhi, Lber 05
U Myntri ka tnad Kam Pohïing ka Sorkar Pdeng u Amit Shah u la pyllait paidbah ïa ki saw tylli ki atiar digital bad pyllait paidbah ïa ki mascot – “Pragati” (kynthei) bad “Vikas” (shynrang) na ka bynta ka Census-2027 ha New Delhi. Ka Centre for Development of Advanced Computing (C-DAC) ka la pynwandur ïa ki rynsan digital kiba katkum ka juk mynta ban pynsuk ïa ki kam shim jingkheiñ ha kylleng ka ri. Ha kane ka sngi la ïadon lang katto katne ngut ki heh ophisar kiba kynthup ïa u Union Home Secretary bad u Registrar General bad Census Commissioner of India.
Ka Sorkar Pdeng ka la pynbna ïa ka jingthmu jong ka ban pynlong ïa ka Census 2027 lyngba ka Gazette Notification ha ka 16 tarik Jylliew 2025, da kaba sdang ïa ka khana samari. Ka Census-2027, ka ban pynlong ha ki 2 tylli ki bynta, ka dei ka khana samari kaba heh tam ha ka pyrthei. Ha ka sien kaba nyngkong, ïa ka Census yn pynlong lyngba ki lad digital, bad ha ka sien kaba nyngkong, yn don ka lad ai jingkheiñ dalade.
KI MASCOT “PRAGATI” BAD “VIKAS”
La pyllait paidbah ïa ki mascot “Pragati” (ka nongkheiñ kynthei) bad “Vikas” (nongkheiñ shynrang) ban shakri kum kiba suk ban ïakren, kiba ïadei bad ka Census-2027. Kine ki mascot ki pyni ruh ïa ka jingïashim bynta kaba ryntih jong ki kynthei bad shynrang ha kaba pyndep ïa ka jingkut jingmut ban pynlong ïa ka ri India kum ka ri kaba la kiew shuwa u snem 2047. Lyngba kine ki mascot, yn pynphriang ïa ki jingtip, ki jingthmu, bad ki khubor ba kongsan kiba ïadei bad ka Census 2027 ha ka rukom kaba bit ba biang bad kaba ïadei bad ki nongshong shnong bapher bapher.
KI SAW TYLLI KI ATIAR DIGITAL
Ka Census 2027 kan dei ka khana samari kaba nyngkong jong India kaba la pynlong da kaba pyndonkam ïa ki atiar digital. Ki saw tylli ki rynsan digital ba la pyllait paidbah da u Myntri u Amit Shah, ki long ka House Listing Block Creator (HLBC) Web Application: Ka web-map application kaba ïarap ïa ki Charge Officer ban shna ïa ki House-listing Block lyngba ki lad digital da kaba pyndonkam da ki dur na ki satellite, kaba pynthikna ïa ka jingryntih ka kam ha kylleng ka ri.
Ka HLO Mobile Application: Ka offline mobile application kaba shngaiñ na ka bynta ki nongshim jingkheiñ ban lum bad upload ïa ki House-listing data. Tang ki nongshim jingkheiñ kiba la pynrung kyrteng ha ka rynsan CMMS ki lah ban ïoh ïa ka application. Ka app ka plie lad ban pynpoi beit ïa ki jingtip na ka jaka treikam sha ka server, kaba pynduh noh ïa ki rukom treikam kiba rim. Baroh ki House-listing data yn lum lyngba kane ka app, kaba lah ban pyntreikam tang da kaba pyndonkam ïa ki number mobile ba la rejister. Kane ka application ka long kaba ïadei bad ki rynsan Android bad iOS bad lah ban pyntreikam ïa ka ha ki 16 tylli ki ktien jong ka thaiñ.
Ka Self-Enumeration (SE) Portal: Ha ka sien kaba nyngkong, la wanrah ïa ka lad ban ai jingkheiñ hi dalade. Ka SE Portal ka dei ka lad ba la pynshong nongrim ha ka kam digital kaba shngaiñ kaba ailad ïa ki nongai jingtip kiba dei hok hapoh kawei ka longïing ban phah ïa ki jingtip shaphang ka longïing jong ki online shwa ban sdang ka jingshim jingkheiñ ha man ki ïing. Hadien ba la dep ban aiti, yn sa pynmih ïa ka Self-Enumeration ID (SE ID) kaba kyrpang. Ïa kane ka Self-Enumeration ID (SE ID) yn ïasam lang bad u nongshim jingkheiñ ha kano ka nongrim u nongkheiñ un lah ban pynshisha ïa ki jingtip.
Ka Census Management and Monitoring System (CMMS) Portal: Ka jaka pdeng, kaba la pynshong nongrim ha ka kam digital kaba la saiñdur khnang ban pynkhreh, pynïaid, pyntreikam, bad peit bniah ïa baroh ki kam kiba ïadei bad ka census ha kylleng ki kyrdan pynïaid kam. Ki ophisar ha ki Sub-district, District, bad Jylla ki lah ban buddien ïa ka jingïaid shaphrang jong ka jingshim jingkheiñ, ka jingtreikam ha ki jaka, bad ka jingpynkhreh ban treikam ha ka por lyngba ka dashboard ba la pynïasoh lang.
Hapoh ka Census-2027, yn lum ïa ki jingtip da kaba pyndonkam ïa ki mobile application kiba shngaiñ da kaba leit sha man ki ïing bad yn pynthikna ïa ka jingpyntreikam kaba pura. Na ka bynta kane, palat 30 lak ngut ki nongshim jingkheiñ, ki nongpeit bad kiwei kiwei ki nongshim jingkheiñ ba dei peit ïa ka Census yn pyntreikam ha kylleng ka ri na ka bynta ka Census-2027.
Kane ka jingpdiang ïa ka teknoloji kaba la pynbeit bha ka pynïasoh lang ïa ka jingsaiñdur thymmai bad ka jingkynthup lang ïa baroh, kaba pynthikna ba ka Census 2027 kan long kaba thikna, kaba shngaiñ bad kaba bniah.
Ïa ka Census-2027 yn pynlong ha ki ar bynta kata ha ka Bynta 1, yn lum ïa ki jingtip shaphang ki jinglong jingman jong ki ïing bad ki jingdonkam ha ïing katba ka Bynta 2 yn buh jingthoh ïa ki jingtip shaphang ka jingbun briew, ka imlang sahlang, bad ka ïoh ka kot jong uwei pa uwei u briew ha ka ri.
Ïa ka jingpynbna na ka bynta ka Bynta 1 la pynmih ha ka 7 tarik Kyllalyngkot 2026. Ïa ka House-listing and Housing Census yn pynlong hapdeng ka 1 tarik Ïaïong 2026 bad ka 30 tarik Nailur 2026, ha ka por ba bteng kaba 30 sngi, ba la pyntip da kawei pa kawei ka Jylla/Union Territory. Ka por ba lah ban jied kaba 15 sngi ban ai jingkheiñ dalade kan long shwa ka jingshim jingkheiñ ha man la ki ïing.
Ïa ka jingkheiñ ïa ka jingbun briew yn pynlong ha u bnai Rymphang 2027 ha kylleng ka ri India.
