Shillong, Lber 05
Ka Kur Shangpliang ka la pynkup burom ïa ki khun samla kiba don ïa ki sap ba kyrpang ha ki jingïalehkai bapher bapher ha ka Dorbarbah jong ka Kur Shangpliang kaba la ju pynlong shisien ha ka shisnem, ha ka sngi Balang ha madan Langlin kaba ha Mawsynram.
Kine ki long u Bamanbha Shangpliang, ka Bakmen-hun Shangpliang, Gracel Pr Shangpliang, Habandarisa Shangpliang, u Kitbok Shangpliang, Shongdorlang Shangpliang bad u Da U Labiang Shangpliang.
U Bamanbha u dei u rangïalehkai kriket uba la mihkhmat ïa ka Jylla ha kiba bun ki lympung ïalehkai kiba la pynlong da ka BCCI kiba kynthup ïa ka Vijay Hazare Trophy 2023-24 ha Rajasthan, Ranji Trophy ha Gujarat bad kiwei ki lympung ïalehkai kiba la long ha ka Jylla.
Ka Bakmenhun ka dei ka ‘thei ïalehkai Gymnastic kaba la mihkhmat ïa ka Jylla ha ki lympung ïalehkai kiba la long ha kylleng ka ri India kum ka 69th National School Gymnastic Championship 2025-26 ha Salt Lake, Kolkata, ka 5th Meghalaya Games 2024 bad kiwei ki lympung.
Ka Gracel ka dei ka ‘thei ïalehkai phutbol kaba la shim bynta ha ki lympung kiba la ju pynlong hapoh ka Jylla bad kumjuh ha ka lympung ïalehkai phutbol ba la pynlong da ka Reliance Foundation na ka bynta u snem 2023-2024.
U Kitbok u dei u rangïalehkai uba don ïa ka sap ha ka jingpyni dohksah ha kaba u la mihkhmat ïa ka Jylla ha ka Mr. & Ms. East India Zonal Championship 2022 bad u la wan ha ka kyrdan ba-ar.
Ka Habandarisa kaba na Mawsynram ka dei ka samla kaba don ïa ka sap ïalehkai ha ka kriket ha kaba ka la ïoh ban mihkhmat ïa ka Jylla ha ka Under-15 Girls ODI Trophy ba la pynlong da ka BCCI na ka bynta ka aïom ïalehkai 2023-2024 ha Kolkata.
U Shongdorlang u dei u rangïalehkai jong ka Softball ha kaba u la ïoh ban mihkhmat ïa ka Jylla ha ka 46th Senior National Softball Championship kaba la long ha u snem 2025 ha Amravati.
Katba u Da U Labiang u dei u rangïalehkai kriket ha kaba u la ïoh ban mihkhmat ïa ka Jylla ha ka Under-19, kumjuh ka Coach Behar Trophy 2023-24, ka Vinoo Mankad Trophy bad kiwei ki lympung ïalehkai ba la pynlong da ka BCCI.
Kane ka jingpynkup burom ka long shi bynta ban pynshlur bad ban ai mynsiem ïa ki khun samla jong kane ka kur ba kin nangïai trei shitom shuh shuh ha ki kam ïalehkai khnang ba kin long ki khlur ïalehkai kiba kynsai bad ruh ban wanrah burom ïa ka Jylla bad ïa ka ri hi baroh kawei.
Ïa kitei ki samla la pynkup burom da u nongai buit jong ka Kur Shangpliang u Bah H.M Shangpliang ha kaba la ïadon lang ki nongïalam jong ka seng kur Shangpliang bad ki parakur kiba la wan sha katei ka jingïalang.
