Shillong, Lber 05
Ka seng jong ki nonghikai ka North Eastern Hill University ka pynpaw ïa ka jingpynrem jur haba ïadei ka jingshah shoh bad shah pynmynsaw u Prof. K.C Biswal ha ki briew ba khlem lah ban ithuh dur khmat ha ka janmiet jong ka 2 tarik Lber ha surok Mawlai by-pass.
U Prof. Lakhon Kma u President ka North Eastern Hill University Teachers’ Association (NEHUTA) haba kren sha ki nongthoh khubor ha ka sngi Palei u la ong ba u ïoh jingtip ïa kane ka jingjia ha ka 3 tarik Lber lyngba ki kot khubor, ha kaba u la pynpaw ka jingpynrem jur ïa kane bad kyntu ïa ki pulit ban leh ïa kaba donkam katkum ki bor ka aiñ ban tohkit bad pynshitom ïa kiba donkti.
U Prof. Lakhon Kma u la pynpaw ruh ka jinglyngngoh ba kumno u Prof K. C Biswal u ba dei u nonghikai ha Management ka Tura Campus u poi sha NEHU? U la ong ba na ka liang ka seng ki la dep kdew shai ba kano-kano ka ‘appointment’ ba la thung da u Prof. Shukla na Guwahati ne nangno nangno khlem da don hapoh ka Campus kim lah ban pdiang bad ban ithuh.
U Prof. Lakhon Kma u la ong ba u Prof. Shukla u la jah na NEHU Campus la 474 sngi, hynrei kaba lyngngoh ka long ba ha kano ka rukom u dang thungkam ïa u Registrar Incharge ha NEHU bad kdew ba u Prof K. C Biswal u dei na Tura Campus bad pynpaw ïa ka jingbym sngew ïahap ban thung ïa u Registrar u ba dei na ka Campus barit.
“Kine ki dei tang ki kam be-aiñ u Shukla bad ki don byllai, ka seng kam lyngngoh shuh bad ka seng ka pynshai kdar ba ka jingthung kam na u Prof. Shukla yn ym pdiang shane bad ngi kdew shai ba ngim treh ban pdiang,” la ong u Prof. Lakhon Kma.
U Prof. Lakhon Kma u la ong “Ngi ruh ngim da tip ïa kane ka jingjia namarba ka khlem jia ha Campus jong ngi bad ngi ïohsngew lyngba ki ladpathai khubor, lehse u don ka jingïashun badno badno ngim tip bad ngim pat ithuh ïa u namar um dei na Campus NEHU jong ngi namar u dang shu wan na Tura Campus.”
Haba bynrap shuh-shuh u Prof. Lakhon Kma u la ban jur haba ïadei ka jingpep trei u Prof. Shukla bad kynnoh ba ka Ministry kam kwah ba un leit phai lehse bad ka por ba un trei ha NEHU ruh kan sa kut noh sa tang 4 bnai.
U Prof. Lakhon Kma u la bynñiaw ïa ka jinglong jingman ba hapoh jong ka skulbah ha kine ki snem ba ka don hapdeng ki kynrum kynram tang namar ka jingbym biang u ba dei peit jong ka skulbah, hynrei u la buh ka jingkyrmen ha ki por ban wan ba ka NEHU kan ïoh ïa u VC u ba don shisha ka jingmut ban trei, ban kyntiew ïa ka University khnang ba ka lawei jong ki khynnah pule bad ka lawei jong ka pule puthi ha ka thaiñ ka long kaba pura bad kaba kiew ha ki por ban dang wan.
