Shillong, Lber 05
Ki pulit ka Anti?Narcotics Task Force ha ka sngi Palei ki la kem noh ïa uwei u nongshong shnong ka Manipur na nongbah Shillong bad ban kurup ïa u drok ba khia kumba 71 gram.
U Superintendent of Police ka ANTF u Vikash Kumar u la ong ba ki pulit ki la ïoh jingtip ha ka sngi Balang ha ka por kumba 10 baje mynmiet, kaba kdew ba uwei u nongkhaïi drok ba la tip kyrteng kum u Hegin Guite u la wan sha Shillong na Manipur bad ba u sah hapoh ka Rainbow Hotel, Police Bazar, bad ba la suba jur ba u la rah lang bad ki jingdih buaid bad u.
Kumta na ka liang jong ka kynhun ki pulit ANTF ki la pynlong ka jingkhynra ha katei ka hotel ha ka por shiteng synñia.
“Ha ka por ba la pynlong ka jingtalasi, la lap haduh hynñiew tylli ki song thep sabon ha kaba la thep bha ïa u drok ba la suba jur u heroin. La ong ba ka jingkhia jong une u drok ba la ïoh kurup u long kumba 70.93 gram,” la ong u SP.
Hadien kane, la kem noh ïa u Guite bad la aiti sha ki pulit jong ka thanad Sadar ryngkat bad utei u mar ba la ïoh kurup bad ha kajuh ka por la dep ruh ban ujor da ka ejahar.
