Shillong, Lber 05
Ka India ka la lah ban pynthikna biang ban jam sha ka final ha ka T20 World Cup, hadien ba ka la lah ban pynliem noh ïa ka England da 7 run ha ka sngi Palei ha Wankhede Stadium, Mumbai.
Kane ka lahduh jong ka aïom ba la lah, kan pynkhreh ban ïaknieh ïa ka nam lahduh pyrshah ïa ka New Zealand ha ka final ka ban long ha ka sngi U Blei.
U Shivam Dube, uba la shah bynshet ïa ka kam ban ïada ïa ki 30 ron ha ka over kaba khatduh, u la lah ban ïalehkai bha haduh ban da lah ban pynurlong ïa ka jingjop. U la ai tang lai ron na ki 3 bol na ka bynta ban khanglad ïa ka England.
Haba wan shimti ïa ka pali tied kaba nyngkong, ka India ka la kamai 253 run bad shah pynhap 7 wiket ha ki 20 over. U Sanju Samson u la long u nongtied uba kynsai ha kaba u la lah ban kamai haduh 89 run na ki 42 bol. Une u rangïalehkai u la lah ban ïakhun tyngeh naduh kaba sdang kum u nongtied uba nyngkong ha kaba u la ïoh ban khyrwit 8 tylli ki ‘four’ bad 7 tylli ki ‘six’ ryngkat u Abhishek Sharma, ula tied tang 9 run ha ki 7 bol.
U Samson bad u Ishan Kishan ki la lah ban pynurlong ïa ka India ban kynjoh sha ki 100 run.U Kishan u la lah ban tied 39 na ki 18 bol. U Samson bad u Kishan ki la lah ban bynrap lang 97 run na ka bynta ka wiket kaba ar. Kiwei pat ki nongtied ka India ki la lah ban kamai ruh ki long u Shivam Dube (43), Ishan Kishan (39), Hardik Pandya (27) bad u Tilak Varma (21).
Haba wan beh ïa ka thong kaba 254, u Jacob Bethell u la lah ban ïalehkai bha na ka bynta ka England ha kaba u la ïoh ban khyrwit 105 run na ki 48 bol, hynrei kine kim shym la lah ban pynurlong ïa ka England namar ka la lah ban kamai tang 246 run bad shah pynhap 7 wiket ha ki 20 over.
U Jasprit Bumrah (1/33) u la long u nongkawang bol uba kynsai, katba u Hardik Pandya (2/38) u la lah ban pynhap 2 wiket.
