Shillong, Lber 05
Kawei na ki nongñiah kali ba paw ka Jylla, ka Phoebe Dale Nongrum ka la wan ba-ar ha ka jingïakop ñiah kali ba la tip kum ka Blueband FMSCI Indian National Rally Champion -ship (INRC) Season 2025-2026 jong ki kynthei.
Ïa kane ka jingïakop la pynlong ha Nashik kaba ha Maharashtra naduh 27 tarik u Rymphang haduh 1 tarik mynta u bnai, ha kaba Phoebe ka la lah ban pynpaw ïa ka jingtbit ban ïakhun pyrshah ïa kiwei pat ki nongñiah kali ba kynsai jong ka ri kat haduh ba ka la lah ban kynjoh sha ka thong.
Haba ïakhun ha baroh hynriew tylli ki wat (round) jong kane ka jingïakob jong ka ri, ba la pynlong ha ki jaka bapher bapher ha kylleng ka ri, ka Phoebe ka la pyni ïa ka jinglong ba ïaineh, ka jinglah ban ïakhun, bad ka jinglong rangbah kum u nongñiah ba tbit.
Naduh ki jaka ïalehkai kiba stet haduh ki bynta ba long lum bad kiba kham eh, ka Phoebe ka la ïakhun tyngeh ban pyni ïa ka mynsiem ïakhun bad ka jingkut jingmut na ka bynta ban kynjoh sha ka thong.
Kane ka jingwan ha ka kyrdan ba-ar jong ka kam dei tang ka jingjop shimet, hynrei ka dei ka jingjop kaba khraw na ka bynta ki jingïakop ñiah kali ha Meghalaya bad ha ka thaiñ shatei lammihngi.
Na ka liang ka Megha -laya Motorsports Society ka la ai khublei ïa ka Phoebe halor ka jingjop ka jong ka ha katei ka jingïakop. Ka jingïaid lynti jong ka ha baroh kawei ka samoi ka la long ka jingsarong bad jingai mynsiem ïa kiwei pat ki nongñiah kali kiba kwah ban long kiba paw, khamtam ïa ki samla kynthei kiba don ïa kane ka jingangnud.
Ka jingjop jong ka, ka pyni ïa ka jingkhlaiñ kaba nangkiew shaphrang ha kane ka jingïakop ñiah kali ha ka ri hi baroh kawei.
Te kumta katei ka synjuk ka la ai ka jingkitbok kitrwiang ïa katei ka samla ba kan nangkiew shaphrang ha kiwei pat ki jingïakop ki ban sa long nangne shakhmat.
