Shillong, Lber 05
Hadien ka jingduhnoh ka Shillong Parliamentary Constituency ïa u Nongmihkhmat sha ka ïingdorbar thawaiñ Parliament, ka mat ilekshon shiteng samoi (by-election) ka la dei ka phang ïakren kaba la thnem bha ha ki rynsan paidbah (social media) bad ha kiba bun bynta.
Ki khubor ba na sharum shaneng ki ong ba ka Sorkar MDA-II ba la lam khmat da ka National People’s Party (NPP) ha ryngkat ki seng saiñ pyrthei ba don lang ha ka Sorkar kin sei da u kyrtong ïamonlang ban ïakhun ha ka ilekshon shiteng samoi.
Haba pyrshang ban wad jingtip na ki nongïalam ka United Democratic Party (UDP) ïa kane ka phang ki pynpaw ba ka dang kloi palat ban ong eiei halor kane bad kyntait ban jubab eiei, hynrei ka party kan sa shong jingïalang ha kine ki sngi ban wan hapdeng ki heh jong ka party kumjuh ki MLA bad MDC jong ka party ban shim ïa ka rai.
Shuh-shuh haba ïakren ïa ki nongïalam ka Hills State People’s Democratic Party (HSPDP) ïa kane ka bynta ki la pynpaw ba ka party kan sa shong jingïalang ban ïa pyrkhat ha kine ki taïew ban wan bad ïa kaba mynta ka party kam pat kwah ban ong eiei.
Kum ban shu kdew ki seng saiñ pyrthei ba donlang ha ka Sorkar MDA-II ba la ïalam da ka National People’s Party ki kynthup ïa ka United Democratic Party (UDP) kaba don 12 ngut ki MLA, ka Bharatiya Janata Party (BJP) kaba don 2 ngut ki MLA bad ka Hills State People’s Democratic Party (HSPDP) kaba don 2 ngut ki MLA ba mihkhmat hapoh ïingdorbar thawaiñ ka Jylla.
Kum ban shu kdew ka Election Committee jong ka Voice of the People Party (VPP) kaba la duh noh ïa u Dr. Ricky A.J Syngkon (bam kwai ha dwar u Blei) MP Lok Sabha, ha ka 2 tarik u Lber ka la tyrwa ïa ka kyrteng u Dr. Batskhem Myrboh ban long kum u kyrtong ban ïakhun sha kane ka ilekshon shiteng samoi.
