Shillong, Lber 05
Ka Rangkynsai SC ka la long sa kawei pat ka kynhun kaba la rung sha ka final ha ka Super Division Cricket League 2026 ba la pynïaid da ka Shillong Cricket Association (SCA) bad kan ïaknieh ïa ka nam lahduh pyrshah ïa ka Royal CC ha ka jingïakhun final ka ban long ha ka sngi Saitjaiñ.
Kane ka jinglah ban pynthikna ka la wan hadien ba ka la pynliem noh ïa ka Nongmynsong CC da 45 run ha ka semi final kaba la long ha ka sngi Palei ha madan ïalehkai kriket jong ka MCA ha Polo.
Ha kane ka jingïakhun ka Nongmynsong kaba la jop ïa ka kynting pisa, ka la ailad ïa ka Rangkynsai ba kan tied nyngkong ha kaba ka la kamai 260 run bad shah pynhap 9 wiket ha ki 45 over. Kane ka la wan lyngba ka jingïalehkai bha u Ajay Duhan uba la lah ban tied haduh 119 run na ki 125 bol bad u Kishan Lyngdoh u la khyrwit ïa ka shiteng spah kaba 74 run na ki 53 bol. Katba u Santosh PM bad u Bibek Poudel ki la khur mar 2 wiket na ka bynta ka Nongmynsong.
Haba wan beh ïa ka thong, ka Nongmynsong ka la kamai tang 215 run hadien ba ka la shah pynkhyllem baroh ki nongtied ha ki 42.4 over. U Arpita Bhatewara u la khyrwit ïa ka shiteng spah kaba 59 run na ki 73 bol bad u Ram u la ïoh 36 run na ki 52 bol. Katba u Sudhir Sahani bad u Ajay Duhan ki la khur mar 3 wiket na ka bynta ka Rangkynsai. Ïa ka nam Player of the Match la khur da u Ajay Duhan.
Kumba ka la paw ka Rangkynsai ka la long ka kynhun kaba khlem shah rem naduh kaba sdang jong kane ka lympung ha kaba ka la jop baroh san sien ha ki jingïalehkai jong ka Group-B bad kumjuh ha kane ka jingïakhun semi final.
Kum ban shu pynkynmaw ka jingïoh rung final ka Royal ka dei hadien ba la jop da 113 run ïa ka Sporting ha ka semi final kaba nyngkong kaba la long ha ka sngi Balang.
