Shillong, Lber 06
Ka jinghikai skul lane hikai kolej ka dei kawei na ki bynta jong ka jinghikai ban pynsngewthuh bad pynnang pynstad sha ki khynnah pule bad ym tang ba kadei tang ka jinghikai ban pynleit jingmut tang ha ka kot hynrei ka dei ruh kawei ka lad ba ki nonghikai kin ai ka jinghikai kumno ban ïaid ha ka lynti kaba dei bad ban lait na ki jingsniew ba bun jait.
Haba ki nonghikai ki don ka mynsiem ban ïeid bad hikai ïa kaba ba bha bad ban long paralok ruh, ki khynnah pule ne khynnah skul ki don ka mynsiem ban ïeid thep mynsiem bad ban burom mar kylliang.
Kumba ong ka ktien ki nonghikai ki dei ki Kmie ki Kpa ba-ar ha ka jingim jong ki khynnah skul.
Ia kane ngi lah ban sakhi ïa u wei u samla uba la hikai ha kawei ka kolej kaba la tip kyrteng ka St Xavier’s College, kaba don ha Umoid, Mawkyrwat, kata u Samla Royalborn Makri ha kaba u la ai ka jinghikai kaba bha tam na ka bynta ka lawei bad ka jingbha sha ki khynnah pule.
Kumta na ka liang u Nongsaiñ Hima u la leit ban ïa kynduh kyrpang ïa u ne u samla ha ka jaka ba u sah, kaba don ha Shnong Mawpat, Shillong.
Haba ïoh ban ïakren bad u ne u Samla hadien ba ka durkhih kaba la saphriang ha ki rynsan social media ba ki khynnah pule ha katei ka kolej ki la ïam paid dohnud kaba buh jingkylli, ba balei ki khynnah ki ïam bad jaw ki ummat ha katei ka sngi?.
U samla Royalborn Makri u la ïathuh ba kane ka jingïam paid dohnud jong ki khynnah pule ka dei ha shuwa ba un mih noh na katei ka kolej ban wan noh sha Shillong bad ki khynnah baroh ki bynnud namar ba ki ong ba u dei u nonghikai uba ïeid bad sngewtynnad eh.
U ong ba nga ai ka jinghikai kaba bha na ka bynta ki khynnah namar ba ki dei ki khynnah kiba na nongkyndong bad ki donkam shisha ba kin ïoh ïa ka jinghikai kaba biang. Nga hikai sha ki ba kan long kaba pdeng la ka long kiba la kham tip bad kiba duna ruh kumjuh.
“Haba nga la leit hikai sha ka tei ka kolej, nga lap ba ki dei beit khynnah kiba la long kloi ban pdiang ïa ka jinghikai bad kim dei ki khynnah ki ban don ïakata ka jinglong ba sniew ne ban ong ba ki la tip lut ha ka liang ka pule puthi. Ki long ki khynnah kiba shi sur shi dur bad kiba kloi ban pdiang ïa kaei kaba nga hikai. Ka jinglong jong ki khynnah ka pynlong ïa nga ba ngan ai shuh shuh ïakata ka jinghikai kaba bha tam,” la ong u Samla Royalborn.
U la ïathuh ruh ba baroh ki khynnah kiba ïam ki dei hapoh ka jingpeit jong u kum u class teachers bad nga ai ka jinghikai kab kumjuh sha baroh la k long uba biej ne uba stad, uba duk ne uba riewspah. Kane ka dei kawei kaba la pynlong ïa ki khynnah ba kin ktik ka mynsiem bad ban don ka jingshah ithuh ha ki nonghikai.
Nalorkata u la ong ruh ba ki don ki nonghikai teng teng ki leh shilliang bad noh shilliang hynrei nga pat de ngam long kumta hyn rei nga pyrshang pat de ban buh ha kata ka rukom ban long ïa kajuh lang ïa baroh.
Kumta na ka liang u Samla Royalborn u la kyntu sha baroh ki nonghikai ba kin sngewbha ban don ka mynsiem ban leh kajuh bad ban ai ka juh ka jinghikai ym ban noh shiliang ïa ki khynnah pule.
Ka jingmih noh jong nga na katei ka Kolej ka dei kaba nga la ïoh ïa ka kam hikai ha Shillong, ka wei ha Mawpat Presbyterian mynsngi bad mynstep ha Shillong Comerse.
