Mawkyrwat, Lber 06
U MLA ka Mawkyrwat Constituency, u Bah Renikton Lyngdoh Tongkhar ha ryngkat u Bah Jowel Marbaniang, Executive Engineer, PWD Mawkyrwat Division, SDO bad JE Jong ka Mawsaw Sub-Division ha ka 6 tarik u Lber, 2026 ki la hiar jurip ïa ki surok ha ka thaiñ Shiliang Um kiba don kumba 6 tylli eiei kiba dei ki surok kiba la donkam kyrkieh ban shna pynbha noh namar ka jingud jingnam ki paidbah man ka por.
Ki surok kiba la ïoh ban leit jurip ha kane ka sngi ki long ka surok ban leit sha Laitnong, Mawthawwiang , Mawsaw ka surok na bynta ka jingpynkhreh ïa ka jingïaseng ‘Temperance’ jong ki kynthei , Langtor , Ngundilang bad ka surok ban leit sha Parish Mawpat na ka bynta ka jingïaseng Procession.
U Bah Renikton haba ai jingkren u la ong ba u don ka jingkyrmen kaba skhem ba ka Sorkar ha kine ki bnai ban wan kan sa ïoh ban mang pisa kyrkieh noh ïa kine ki surok kiba donkam eh.
U la ai khublei ruh ïa ka Sorkar kaba la lah ban mang pisa bun tylli ki surok ha ka thaiñ Mawkyrwat bad u la ïathuh ba tang ha kine khyndiat taïew, ka Sorkar ka la mang pisa thymmai kumba 5 tylli ki surok bad u ngeit skhem ba shen yn sa ïoh ban pyntrei ban khot ‘tender’ noh.
U la ai khublei sa shisien ïa ka Sorkar kaba la shmkhia ban ai surok ïa kane ka dong ka thaiñ bad u khmih lynti ba ka jinglah ban pyndep ïa kine surok kan sa don ka jingkylla dur hapoh ka thaiñ Shiliang Um baroh kawei khamtam ïa ka surok bah na Jashiar, Mawthawïang haduh ka surok ‘Intermediate Road’ ha Lad Jynrai.
“Ngi ïohi ba ka jingpyntrei ka la ïaid mynta bad kaba dang sah ngi kwah ban pyndep noh, ngin ïai buddien kawei hadien kawei ïa kine ki surok bad nga don ruh ka jingkyrmen ba ha kine ki ar snem ban ïohi ïa ka jingkylla kaba khraw ha kaba ïadei abd ki lynti ki syngkien ha baroh kawei ka constituency,” u la ong.
