Washington, Lber:
U heh ka tnat pahara jong ka US, ha ka Sngi Palei u la iathuh ba ka United States ka la ioh siat pyn julor ia palat 30 tylli ki jhad jong ka Iran, katba ka thma ka la neh mynta la 7 sngi lynter hapdeng ka US bad Israel, pyrshah ia ka Iran.
Ha kajuh ka por, la ong ba ka jingther ‘namding jong ka Iran pat ka la hiar da 90% naduh ka sngi ba nyngkong jong ka jingiakynad. Ka jingleit thombor ki drone ka Iran ruh ka la hiar da 83% naduh ka sngi kaba sdang nyngkong jong ka thma, la ong u Cooper, u heh jong ka tnat Central Command, kaba long ka tnat ba kongsan tam ha ka jingphah ia ki shipai bad ki liengsuiñ thma sha Middle East.
Namar la ong ba ka United States, ka la pyni bor tyngeh ha ka jingleit thombor jong ka pyrshah ia ka Iran ha kane ka sien, ryngkat da ka jingiatrei lang bad ka Israel ha ka 26 tarik u Rymphang. Kumjuh ruh na ka liang jong ka Iran, ka la pynphai kylliang bad ka la phah thombor da ki drone bad kumjuh ruh da ki ‘namding ba khlaiñ bor jongka, pyrshah ia kitei ki ri kiba ia jingkyrshan ia ka Israel bad US hapdeng kane ka thma.
La ong ba ka US ka la ioh lad ban leit thombor ia ka Iran, hapdeng ka jingiakynad jong ka Israel bad Iran bad kaba la jia ruh ha ka por ba ka Iran kam shym la pdiang ia ki jingdawa jong ka United States.
