Mawkyrwat, Lber 06
Uwei u samla ba 24 snem ka rta na ka shnong Manad uba tip kyrteng kum u Imanningstar Nongbsaw u la duh ei la ka jingim hadien ba ka thuk-thuk kaba u ñiah ka la hap sha Riat Twahra-niang kaba don hajan ka shnong Photjaud, South West Khasi Hills District.
Katkum ki tyllong khubor na ki pulit la ïathuh ba ha ka step jong ka 4 tarik u Lber 2026, ki khynnah ki la ïohi ïa kawei ka thuk-thuk Yamaha R-15 kaba don ïa u ‘Registration No.’ ML 10 – B – 0962 ha kawei ka riat kaba jrong kumba 16 mitar eiei.
Shuh shuh la ïathuh ba katei ka thuk-thuk ka la hap ha ka 3 tarik u Lber 2026 ha ka por kumba 11 baje eiei mnmiet ha ka por ba u nongñiah u dang wanphai na Mawkyrwat.
Ha ka jingtohkit , ki pulit ki la lap ba katei ka thuk-thuk ka dei jong u (L) Imanningstar Nongbsaw (24 snem ka rta), khun jong ka Kong Baialin Nongbsaw na ka shnong Manad bad la lap ba ka la don ka jingphlei snam kaba jur na bynta jong ka khlieh.
Ha kaba ïadei bad katei ka jingjia, na ka liang ki bahaïng hasem ki la kyrpad ban pyllait ïa ka ‘Post Mortem’ namar kim don ka jingsuba sniew ïano-ïano bad ïa ka met kaba dang sah jong u Imanningstar Nongbsaw la aiti noh sha ki bahaïng hasem na ka bynta ban pyndep ïa ka jinglehniam ba khatduh.
