Shillong, Lber 06
Ka lympung ïalehkai Inter Office Cricket League 2026 ba la pynïaid da ka Shillong Cricket Association (SCA) ka la nangjam shaphrang ha ka sngi Thohdieng ha kaba ka Shillong Police Cricket Team bad ka Meghalaya Khasi Government Employees (MKGE) ki la khur jingjop.
Ha kane ka jingïakhun, ka Meghalaya Khasi Government Employees ka la pynliem noh ïa ka Police Headquarter da 53 ron.
Ka Police Headquarter kaba la jop ïa ka kynting pisa ka la ailad ïa ka Meghalaya Khasi Government Employees ban tied nyngkong ha kaba ka la kamai 184 run bad shah pynhap 5 wiket ha ki 20 over. U Banphira Basaiawmoit u la tied 52 run na ki 37 bol bad u Shembhalang Pyngrope u la ïoh 38 ron na ki 16 bol. Katba u Bishal Chettri u la khur 1 wiket bad 2 wiket da u Sandeep Roy.
Haba wan beh ïa ka thong, ka Police Headquarter ka la kamai tang 131 run hadien ka jingshah pynkhyllem baroh ki nongtied ha ki 16.4 over.U Sudhir Choudhary u la tied 38 run na ki 34 bol bad u Prakash Uniyal u la tied 34 run na ki 14 bol. Katba u Sanvert Kurkalang bad u Benjamin Mawthoh ki la khur mar 3 wiket. Ïa ka nam ‘Player of the match’ la khur da u Sanvert Kurkalang.
Haba phai sha kawei pat ka jingïakhun kaba ar, ka Shillong Police Cricket Team ka la jop da 8 wiket ïa ka West Jaintia Employees. Ka West Jaintia Employees kaba la kam trai ban tied nyngkong,ka la kamai 156 run bad shah pynhap 8 wiket ha ki 20 over. U Mebakar Suting u la tied 46 run na ki 41 bol bad u Heimon Dkhar u la ïoh 20 run na ki 23 bol. Katba u Bushbashisha Tohtih u la khur 1 wiket bad ïa ki 2 wiket la khur da u Wallambok Nongkhlaw.
Haba wan shimti ia ka pali kaba ar ka Shillong Police Cricket Team ka la lah ban kynjoh sha ka thong da kaba kami 157 run bad shah pynhap 2 wiket ha ki 13 over. U Wallambok Nongkhlaw u lalong u nongtied uba kynsai da kaba u la kamai 65 ron na ki 37 bol bad u Bushbashisha Tohtih u la ioh 41 ron na ki 21 bol. Katba u Rainbow Phawa u la khur 1 wiket. Ïa ka nam ‘Player of the match’ la khur da u Wallambok Nongkhlaw.
