Khliehriat, Lber 06
Ki pulit ka Anti Narcotics Task Force (ANTF) ha ka 6 tarik Lber ki la ïoh ban kurup palat 10 kilo u drok ‘Crystal Methamphe -tamine’ uba shongdor haduh kumba T.51.13 klur na ka jingtalasi kali ha Ratacherra, East Jaiñtia Hills, da kaba khot ruh ïa kane kum ka jingïoh kurup drok kaba heh tam ha ka Jylla.
U Assistant Inspector General of Police (A) lyngba u kyrwoh u pyntip ba ki pulit kiba pynlong ïa ka jingtalasi kali ki la ïoh ban bat noh ïa kawei ka Tata Sumo kaba don ïa u nombor (MZ 01 M 8625) kaba shong da ki arngut ki briew kynthup ïa u nongñiah.
Hadien ka jingtalasi, ki pulit ki la ïoh ban kurup haduh 19 tylli ki song plastik sabon na kawei ka kynthei kaba dei napdeng kine ki 3 ngut kiba don haduh 203.7-gram u drok ‘heroin’.
Hadien ki pulit ki la talasi ruh ïa kawei ka pla ‘trolley’ rong ‘blue’ kaba dei jong uwei pat u nongshong kali bad ïoh kurup haduh 10.145 kilo u drok ‘Methamphetamine’.
Ha kaba sdang jong ka jingpeit bniah, ka pyni ba kine ki briew ki dei ka bynta jong ka kynhun khaïi drok kaba kham heh hapdeng ki jylla bad shabar jong u pud,” ong u heh pulit.
Ha ka jingbishar bniah la shem ba une u drok ba la ïoh kurup u shongdor haduh kumba T.51.13 klur ha ki ïew be-aiñ.
Hadien kane ka pynngat mukotduma pyrshah ïa kine ki briew hapoh ki kyndon jong ka NDPS Act bad ka jingtohkit ka dang ïaid shakhmat ban lapdien shuh ïa ki briew kiba donkti ha kane ka kam bymman.
