Shillong, Lber 06
Ki ophisar ka tnad Legal Metrology ka Sorkar Jylla ha ka 06 tarik u Lber 2026, ki la leit biang ban pynlong ïa ka jingtalasi ha ki dukan die tiar bad die marbam ha shilynter ka surok ha Jail Road.
Kane ka jingïai bteng ki ophisar ïa ka jingtalasi ka long kum shibynta ban nym don kano-kano ka jingleh buit tuh ha ka dor sha ki paidbah nongwan thied bad ba ka dei ban long beit ka dor kumba la buh.
Ha kane ka jingtalasi ki ophisar ryngkat bad ki nongtrei ki la lap ba ki don ki dukan kiba bianglut ha ka jingthew ne ki maw kilo bad don ruh ki dukan kiba buh ïa ki tiar khlem da don ïa ka MRP kaba lah ban pynshisha ïa ka dor ban die sha ki paidbah bad la lap shuh shuh ba ka machin thew kilo kam long shuh ban pyndonkam.
Kumta na ka liang ki ophisar mar-mar ki la rah noh ïa kitei ki machin thew kilo namar ba kim long shuh ban pyndonkam ha ka ban thew ïa ki tiar ki tar.
Haba ïadei bad ki jingbam ki bym shym la don ïa ka MRP, ki ophisar ki la song bad rah noh ruh ïa kine ki jingbam ban nym shah shuh ba kin die khlem don ïa ka dor kaba biang.
Ka jingrah noh ki ophisar ïa ki tei ki marbam ka dei namar ba kim shym la don ïa ka MRP kaba lah ban pynthikna ba ka dor jong kata ka jingbam kan long katta katkum ba la thoh ym pat ban kheiñ tam katkum ka dor ba la don lypa.
Lah ban kdew ba ki ophisar naduh hynnin ka sngi ki la sdang ïa ka jingtalasi ïa ki tiar ki tar bad marbam ruh, ba kynthup ha Keating Road, Iewduh bad kiwei-kiwei de ki jaka ha Nongbah Shillong.
