Tehran, Lber:
U Myntri kam bar ri jong ka Iran, u Abbas Araghchi, ha ka Sngi Palei, u la ong ba ka Islamic Republic kam shym la khot iakren ne wanrah ia ka mat jingsangeh thma mynno- mynno ruh bad ka US bad u la kren shai ruh ba ka Iran kam shym don jingthmu ban khang noh ia ka Strait of Hormuz ia mynta.
Haba iakren bad ki lad pathai khubor jong ka NBC, u Araghchi u la ong “Ngim shym la tyrwa ban sangeh iasiat. Ngim shym iohi ia kano- kano ka jingmyntoi ne jingdonkam ban iakren iasuk bad ka US. Ngi la dep iakren shai badki la 2 sien, bad man ka por ba don ki jingiakren, ki ther pyrshah iangi hapdeng ki jingiakren jingiapynbeit, khlem da ailad ne pdiang ia ki jingtyrwa jongngi pat.”
Haba kren shaphang ka Strait of Hormuz, u Araghchi u la ong ba ia mynta hi, ka Iran kam shym don kano- kano ka jingthmu hynrei kumba ka thma jong ka Israel bad US pyrshah ia ka Iran, ka dang iai bteng, ka Iran ruh kam don lad da kum wei pat lait na ka ban pynphai kylliang da ka bor ia kitei ki ri kiba wan thombor ia ka.
Namar la ong ba ka Iran bad ka US, ki la iakynduh la iakren bad iapynbeit la bun sien, hynrei ki jingdawa jong ka United States ki long ki bym lah ban pdiang da ka Iran bad ki jingpyn-eh jong ka Iran ruh ki long ki bym lah ban pdiang da ka Untied States. Dei na kane ka daw, ba ka jingiakynad hapdeng ka Israel bad ka Iran, ka la nang heh arshah, da ka jingdon jong ka US kaba leit ban pynshit bad pynshlur ia ka Israel ba kan leit thombor ia ka Iran ha ka por ba ka Israel kam pat shym la pynkhreh ban leh ia kane.
Katkum ki jingkren jong uwei u heh na Israel, la pynpaw ba ka Israel kam shym don jingthmu ban hiar thma noh ia ka Iran. Hynrei ka thmu ba lada ka Iran ka dang iai kyrshan ia ki kynhun lehnoh kiba ialeh pyrshah bad ka Israel, ka Israel ruh kan hiar thma ia ka Iran ha ki bnai shiteng snem jong une u snem 2026.
