Shillong, Lber 06
U nongïalam ka Megha-laya Pradesh Congress Committee (MPCC) u Bah Manuel Badwar ha ka sngi Palei u la ai dak ba u MP barim u Vincent H. Pala u lah ban long biang u kyrtong ban ïakhun na ka bynta ka ilekshon sha Lok Sabha ka ban sa long shen, hynrei u la ong kat haduh mynta ka party ka khlem pat shim kano-kano ka rai ba pura haba ïadei bad kane ka kam.
U Bah Manuel Badwar haba kren sha ki nongthoh khubor ha ka sngi Thohdieng u la kyntait ïa ki khubor hamasaïa, kaba ong ba un ïakhun ha ka ilekshon MP shiteng samoi na Shillong Parliamentary Seat bad pynpaw kane ka jingmih ka kyrteng jongu ka dei tang ka jingleh da ki katto katne ha ki rynsan ïatai paidbah (social media).
U la ong ba ka Congress kam pat kyrkih ban pynbna kyrtong na ka bynta ka ilekshon MP namar ka Party ka sngewdei ban sei da u kyrtong uba la don ka jingshemphang bad uba la tip bha ïa ka kamram kum u MP.
“Ka Party ka sngew ba kan long kaba eh ban phah da u kyrtong thymmai ban ïakhun ha ka ilekshon MP shiteng samoi namarba u briew thymmai un hap ban wad ki lad ki lynti ban tip khambha ïa kaei kaba donkam ban leh ha nongbah Delhi, lada shah jied” la ong u Bah Manuel.
Shuh-shuh u la ong ba watla ka party kam pat pynleit jingmut halor ka ilekshon MP shiteng samoi, hynrei kam kwah ban phah da u briew ba thymmai. Da kaba ong ba ka party ka kwah ïa u kyrtong MP u ba la tip bha ïa ki kamram.
U Bah Manuel u la ong ba ki don artylli ki mat ba kongsan ba ki paidbah ka Jylla Meghalaya ki la angnud ban ïoh ka jingmynjur na ka Sorkar Pdeng kata ka Inner Line Permit (ILP) bad ban ïoh jingithuh ïa ka ktien Khasi-Garo ha ka khyrnit ba phra jong ka riti synshar ka Ri India.
“Ngi la thikna ba ka Sorkar Pdeng ba ïalam da ka BJP kan nym leh eiei, kum ha ka ban ai jingmynjur ïa ka ILP bad ktien Khasi-Garo, hynrei ka kamram jong u MP lada ki paidbah ki jied ïa ka Congress ka Party kan phah tynruh ïa u MP halor ka jingdonkam ïa ka ILP” u la ong.
Haba bynrap u Bah Manuel u la ong ba ha ki por ban sa wan ka Congress ha Delhi kan wan biang ha ka bor bad ha kata ka por kan pynsuk shibun ïa u MP ban pynbor ban ai jingmynjur ïa ka ILP kumjuh ban ithuh noh ïa ka ktien Khasi-Garo ha ka khyrnit ba phra ka riti synshar ka Ri.
