Imphal, Lber:
Uwei u heh nongïalam ba hakhliehduh jong kawei ka seng lehnoh, ka United People’s Party of Kangleipak (UPPK), u la pyndem noh ïalade sha ki pulit jong ka Manipur, ha ka sngi kaba ar jong ka tamasa Yaoshang/Holi, la ïathuh ki heh sorkar ha ka sngi Thohdieng.
U Moirangthem Raja Singh, ba la tip ruh da ka kyrteng kum u Maiba (41), u kapten jong ka UPPK, u la iehnoh ïa ka lynti jong ka kam thombor ban ïasoh bad ka jingim babha da kaba leit mih hi dalade hakhmat ki pulit.
Katkum ka khubor jong ki pulit ka Manipur ba la pyllait ha ka sngi Thohdieng, la ïathuh ba u Singh u dei u nongshong shnong jong ka Ngangkha Lawai Awang Leikai ha Bishnupur distrik bad u la leit pyndem noh ïalade ha ophis jong ka Imphal West Commando ha Minuthong.
Ha ka por ba u leit pyndem u la rah da ka Mobile bad ka Card Aadhaar.
Kane ka dei ka jingpyndem kaba sah kynmaw hadien ka jingjia ha ka 21 tarik, Ïaïong, 2023, ha kaba ki la don kumba 37 ngut ki lehnoh, kynthup ïa ki 36 ngut na ka Chin Kuki Liberation (CKLA) bad uwei na ka kynhun People’s Revolutionary Party of Kangleipak – Progressive (PREPAK-Pro), ki la aiti ïa ki tiar ïaleh jong ki.
Ka UPPK (kaba la tip ruh kum ka PREPAK-UPPK) kaba dei ka kynhun ba la pait na ka PREPAK bad ka kynhun shipai jong ka, ka Kangleipak People’s Army (KPA) kaba la seng ha ka 6 tarik u Naiwieng, 2008, la ïathuh ba ki la khyllem noh shi syndon ha ka 4 tarik, Ïaïong, 2016.
La seng ïa ka da ka jingthmu ba kongsan ban pynphai biang ïa ka “jingsynshar ba la duh” jong ka Manipur, ka UPPK ka la ïasoi ïa ka jingïateh kular bad ka sorkar jylla bad ka sorkar pdeng ha ka 24 tarik u Jymmang, hadien kata la khmih lynti ba ki nongbud jong ka kin bud ryntih ïa ki kyndon ba kongsan jong ka jingsangeh ïasiat.
Hynrei katto katne na ki dkhot jong ka ki dang donkti ha ki kam dawa pisa khlem jingsngew-synei.
