Nongstoiñ, Lber 06
Ka Khasi Students’ Union (KSU), West Khasi Hills District Unit ha ka 5 tarik Lber, 2026 ka la phah da ka jingthoh sha ka Deputy Commissioner ka West Khasi Hills District ban pan jingshai halor ka jingslem ban plie bad sdang ïa ka ‘Academic Session’ jong ka Nongstoiñ Polytechnic.
Ki nongïalam ka KSU, ki la pynpaw ba ki paidbah ka Nongstoiñ bad ka West Khasi Hills District ki la ap khmih lynti bha ïa ka jingplie ïa kane ka shlem pule, namar ka long kaba donkam bha ban ai jinghikai ‘technical education’ sha ki samla pule bad ban plie lad plie lynti na ka bynta ka jingroi jong ka distrik bad ka Jylla hi baroh kawei.
Shuh shuh ki la ong ba watla la dep pynkhreh ïa kiba bun ki jingdonkam ban sdang ïa ka Nongstoiñ Polytechnic, hynrei haduh mynta kane ka shlem pule kam pat sdang ïa ka ‘Academic Session’ ha kaba kane ka la wanrah ka jingeh bad jingkhuslai ym tang ïa ki samla pule hynrei ïa ki kmie ki kpa kiba thrang ban phah ïa la ki khun ban pule ha kane ka jaka pule.
Ki la ong ruh ba ka KSU West Khasi Hills District Unit ka la kyrpad ïa ki bor distrik ba kan ai jingshai ha kaba ïadei bad ki daw jong ka jingslem ban plie ïa ka Nongstoiñ Polytechnic, ka tarik kaba tikna ban sdang ïa ka ‘Academic Session’, ki kynrum-kynram ha kaba ïadei bad ki trai jaka.
Shuh shuh ki nongïalam ka KSU ki la ong ruh ba na ka liang ka Deputy Commissioner ka la pyntikna ba kan sa tuklar kloi-kloi ïa kane ka kam khnang ba kane ka shlem pule kan ïaid beit ïaid ryntih ban ïoh noh ban plie kham kloi bad ban pan jingshai ruh na ka ‘Education Department’ halor ki kynrum-kynram ba ïadei bad ki trai jaka.
Halor kane ka bynta, na ka liang ka KSU ka la pynpaw ba kan dang bteng ban peitngor bad buddien ïa kane ka kam namar ka bha ka miat jong ki samla bad ka roi ka par jong ka West Khasi Hills District.
