Shillong, Lber 06
Ka Bharatiya Janata Party Meghalaya ha ka sngi Thohdieng ka la rakhe ïa ka sngi kyrpang jong ki longkmie lane ka “Women’s Day” ha ophis treikam jongka, ha kaba la pynkup burom ruh ïa ki longkmie kiba jop ha ki jingïalehkai, kiba seng kam lajong bad kiwei kiwei.
Ha kane ka jingrakhe la ïadonlang u State President ka BJP u Rikkam Momin, u nongaiktien ka BJP u Bah M Kharkrang, ka State President jong ka Mahila Morcha ka Kong Arena Hynniewta bad kiwei kiwei.
Haba kren ha kane ka sngi ka Kong Arena Hynniewta President BJP Meghalaya Pradesh Mahila Morcha ka la pynrem jur ïa ka jingshah thombor jong kawei ka mei ieid ha Ribhoi District dang ha kine ki khyndiat sngi.
Ka Kong Hynniewta ka la ong ba ka phong da ka riam kaba ïong ban pynpaw ïa ka jingsngewdiaw namar ka jingshah thombor jong ki kynthei bad ka jingrakhe ïa kane ka sngi ka long ban lum ban lang ïa ki kynthei jong ka Jylla bad ban ïatreilang bad ban kyrshan iwei ïa iwei.
Ka la bynrap ruh ba ka party ka don jingthmu ban ithuh ïa ki longkmie kiba wanrah nam ïa ka Jylla la ka dei ha ka kam ïalehkai ne ha ka sengkam la jong kiba ai jingmyntoi ïa ki bad kaba ai mynsiem ïa kiwei ba kin long kiba treishitom.
Ka Kong Joyti Wahlang DSP haba ai jingpynshai halor ki aiñ khamtam haba ïadei ka POCSO, ka jingshah thombor pyrshah ïa ki kynthei ka la kiew na kawei ka sngi sha kawei pat ha East Khasi Hills bad pynpaw ba ka jingbun ki kynthei ha ka District bad ka jingdon ki pulit kynthei kam ïahap satia.
Ka la kular ba kan ym shongthait kum ka nongpeit ïa ka shongsuk shongsaiñ ki paidbah bad pynpaw ka donkam ka jingïatreilang ryngkat ki tnad bapher-bapher bad kdew ïa ki jingeh lada ymdon ka jingïatreilang.
Ka la kyntu ïa ki paidbah ban wan sha khmat ban ujor khnang ba ynlah ban ai jingkyrshan bad ban ïarap haba ïa kynduh jingeh bad ban pyndonkam ïa u number 112 haba don kino-kino ki jingshah thombor ïa ki kynthei.
