Shillong, Lber 08
U Myntri Rangbah ka Jylla, u Conrad K. Sangma u la rakhe ïa ka sngi kyrpang ki kynthei ne ka ‘International Women’s Day’ da kaba pynïasoh ïa ka jingshimkhia ka Jylla ban kyntiew ïa ki ‘Self Help Group’ (SHG) bad ki jingkyrshan ïa ki nongseng kam lajong halor ka phang, “Give To Gain”, da kaba ong ba ka jinglaitluid jong ki kynthei ka wanrah ïa ka jingkiew kaba ïar.
Ha ka kyrwoh ha ka rynsan lad pathai, u Sangma haba ai khublei ‘International Women’s Day’ kaba suk ba kmen, u la kitbok kitrwiang ïa ki kynthei “kiba ngeit, kiba thrang, kiba weng ïa ki jingkhanglad, bad kiba jop ïa shibun kiei-kiei” bad thaw ïa ki polisi kiba tawiar ha ka liang ka jingjied bad ka jingskhem jingmut.
“Ha Meghalaya, ka jingpynkupbor ïa ki kynthei ka mut ban pyntikna ba ki kynthei ki don ka jinglaitluid ban jied hi dalade, ban ïoh ka jinglaitluid ha ka liang ka pisa-tyngka, bad ban bud ïa ki jingangnud jong ki da ka jingskhem jingmut,” u la ong.
U la kdew ruh ïa ka jingpynïasoh SHG ha ka Jylla, ka jingïarap sdang na ka bynta ki kynthei nongseng kam bad ki skhim jingïarap ïa ki nongrep kum ki jingsakhi.
“Lyngba ka ‘SHG Movement’ kaba khlaiñ jong ngi, ka jingkyrshan ïa ki kynthei nongseng kam, bad ki prokram ai jingïarap ïa ki nongrep, ngi sakhi ïa ka bor jong ka jingpynkupbor lang, kaba pynpaw shisha ïa ka phang pdeng jong une u snem – ‘Give to Gain’,” u la thoh.
