Washington, Lber:
Katkum ki kaiphod ba la ioh lum, la ong ba ka Russia ka la iadon bynta ha ka thma jong ka US bad Israel, pyrshah ia ka Iran. Watla ka Russia kam shym la iashim bynta ha katei ka thma da kaba paw pyrthei, hynrei ka la iarap ban ai jingkyrshan ia ka Iran, da kaba phah ia ki jingtip bad ki buit sha ka Iran, kumno ban ïakhun pyrshah ia ka US bad Israel bad ia ki jingdonkam ba ka Iran kan lah ban ïakhun pyrshah ia kitei ki ri.
Ka jingkyrshan jong ka Russia ia ka Iran kam shym la long kaba shai bha, hynrei ka jinglah jong ki shipai Iran hi ban wad ia ki shipai jong ka US ka la nang hiar dor naduh ba ka US bad ka Israel ki la hiar thma pyrshah ia ka Iran ha ka taiew ba la dep.
6ngut ki shipai jong ka US, ki la iap bad 18 ngut kiwei pat, ki la mynsaw, hadien ka jingshah thombor jong ka Iran, ha ka Sngi U Blei, ha Kuwait. Ha kaba katei ka drone ka la lynshop ia kawei ka jaka ai bor ha Port Shuaiba hadien ba ka la iaid lait ia ki jaka iada suin jong ka thain.
Ka Iran ka “pynlong ïa ki jingsiat kiba thikna bha ha ki radar ba ai jingmaham kloi lane ki radar kiba don sha jrong jong ka suiñbneng. Ki leh ïa kane ha ka rukom kaba la thmu bha. Ki ïaid hadien ka jingbthah bad jingpynïaid,” ong u Dara Massicot, u riew shemphang halor ki shipai Russia ha ka Carnegie Endowment na ka bynta ka jingsuk ha ka pyrthei.
U Massicot u la ong ba ka Iran ka don tang katto katne tylli ki satellite kiba biang na ka bynta ki shipai bad kam don la ka jong ka kynhun satellite, bad ka jinglah ba kham shajrong jong ka Russia ha suinbneng ka dang pynshisha ba ka long kaba kordor.
Hynrei la ong ba ka Iran ka la nang shah ñion katba nang mih ki sngi. Ka jingpynphai kylliang jongki da ki ‘namding ka la nang duna namar ki la pyndonkam lut ha kine ki sngi ba la dep naduh ba sdang jong ka thma, wat ki shipai duriaw jongka ruh ki la jan lut khoit baroh, ka rukom pynmih tiar thma ka la duna bad ki la kynduh jingeh ha ka jingiakhun pyrshah ia kitei ki shipai jong kiwei pat ki ri.
