Shillong, 08 Lber
Ki nongshong shnong ka Mawlai Mawïong baroh kawei ki la mad ïa ka jingeh kaba khraw ha kaba ka um sorkari kaba ki ju ïoh beit man la ka sngi mynta ka la duh noh kynsan kynsan la kumba ar taïew eiei.
Lah ban kdew ba kane ka dei ka jingbym shimkhia bad ka jinglong kiba khlem akor jong ki katto-katne ngut ki briew, ka la wanrah ïa ka jingeh kaba khraw ha kaba ïadei bad ka umbam-umdih ha ka shnong Mawlai Mawïong.
Ka daw tynrai jong kane ka jingduh um ki nongshong shnong ka Mawïong ka dei namar ka jingpyntuid jaboh sha ka Wah Umshing, kaba long ka tyllong um ba ai sha kane ka shnong.
Hadien ba la ïoh ka jingujor na ki paidbah nongshong shnong na ka liang u nongthoh khubor u Nongsaiñ Hima u la leit bna jngoh ïa ka tei ka tyllong um kaba pynpoi um sha baroh ki paidbah ka thaiñ, ha kaba la lap ba ka um bam um dih ki paidbah ka la sma eit masi bad sma iwtung haduh katta katta.
Halor kane, ki bor shnong ki la jurip bad wad ïa ka daw hynrei kim shem la tip bad sah umdum halor ka daw ka jaboh ka um shing.
Haba la leit ban jurip ïa kane ka wah , la lap ba ka um ka la sma iwtung bad ka rong jong ka ka la jyrngam bad jaboh haduh katta-katta, kaba la pynlong ïa ki nongpynïaid um ban pyllait noh shiwa ïa ka jingden ïa ka wah khnang ba kane ka um jaboh kan tuid noh.
Haba ïakren bad u Rangbah Shnong ka Mawlai Mawïong, u Bah Herman Dohtdong, u la ïathuh ba ka um ka la sdang ban jaboh naduh ba sdang u slap ha u bnai Rymphang. Man u snem ka ju don ka jingjaboh khyndiat tang shu sdang u slap, bad hapdeng shitaïew la lah ban pynkhuid bad ai um biang ïa ki paidbah, hynrei mynta ka kynti, ka jingjaboh ka la palat liam.
Na ka liang ka shnong la leit ban jurip ïa ki tyllong kiba lah ban pynjaboh ïa ka wah wat la ki don kiba suba, hynrei ki nongpynïaid ki la kyntait ba ka jaboh ka wan na ka jaka otdoh kaba don hajan ka marten bad ka Dairy kim dei ki daw ba jaboh kane ka wah, u la ong.
U rangbah shnong u la ïathuh ba ha ka jingjurip jong ki la lap ba ka don ka nala na ka thaiñ Petrol Pump (Madan Lyngkhuid) kaba wanrah ïa ka um kaba kham ïong bad la suba ba ka jingjaboh kaba khraw ka lah ban wan na kine ki thaiñ kiba pyntuid ïa ki jaboh sem masi ha ki thaiñ Mawlai.
“Ka bor shnong ka la dep ban pyntip ïa kane ka jingeh sha ka Tnad PHE, sha u MLA ka Mawlai u Bah Brightstarwell Marbaniang, bad sha ka Mawlai Task Force. Ki Doktor na ka tnad Veterinary ki la wan ban shim ïa ki samples ban leh ïa ka test bad ka kaiphod kan sa phah sha ka Sorkar shen,” la ong u Bah Herman Dohtdong.
U la ong ruh ba mynta, ka shnong ryngkat bad ka tnad PHE ki dang thaw ki lad ki lynti ban pynbha biang ïa ki tyllong um kaba khuid, khnang ba ki paidbah kin nym shitom shuh ban ïoh um ha kane ka shnong.
