Shillong, Lber 08
Ka India ka la rah ïa ka nam lahduh ha ka sien kaba lai ha ka ICC T20 World Cup bad ban long ka kynhun kaba nyngkong ban jop ha la ïing na ka bynta ban bat biang ïa kane ka nam, hadien ba ka la lah ban pynliem noh ïa ka New Zealand da 96 run ha ka jingïakhun final kaba la long ha ka sngi U Blei ha Narendra Modi Stadium, Ahmedabad.
Watla ka New Zealand ka la byrngem ban pynsngap jar ïa ki paidbah nongkyrshan ka India, hynrei kane kam shym la urlong.
Kane ka nam jop ka la wan lyngba Sanju Samson uba la lah ban pynpaw biang ïa ka jingtbit sa ha kane ka jingïakhun final ha kaba u la long u nongtied uba kynsai napdeng ki para nongïalehkai bad ban pynlong ïa ka India ban buh ïa ka thong da 255 run bad shah pynhap 5 wiket ha ki 20 over.
Utei u khlur ïalehkai ba kynsai u la lah ïalehkai bha naduh kaba sdang ka pali tied kaba nyngkong ha kaba u la lah ban tied 89 run na ki 46 bol, kynthup ïa 5 tylli ki ‘four’ lem bad 8 tylli ki ‘six’. Kumjuh u Abhishek Sharma lem bad Ishan Kishan ki la bteng ban ïalehkai bha na ka bynta ka India bad ban khyrwit ïa ki shiteng spah (half century). U Abhishek u la tied 52 run na ki 21 bol (6x4s & 3x6s), katba u Ishan u la ïoh 54 run na ki 25 bol (4x4s & 4x6s).
Kumba ka paw kane ka 89 run ba la ïoh da u Sanju ka long kaba heh duh ha ka jinglah ban kamai ha ka jingïakhun final jong ka T20 World Cup, ha kaba une u khlur ïalehkai u la lah ban tam ïa u Marlon Samuels uba la tied 85 un ha u snem 2016 bad u Kane Williams uba la tied 85 ha u 2021.
Te kumta u Samson u la lah ban don lang hapoh ka thup jong ki khlur ïalehkai barim kum u Shahid Afridi ha u smem 2009 bad u Virat Kohli ha u snem 2014.
Ha ka jingkawang bol, u Jasprit Bumrah (4 wiket) bad u Axar Patel (3 wiket) ki la long ki nongkawang bol kiba kynsai, ha kaba ki nongtied ka New Zealand ki la shah pynkhyllem lut baroh bad ban kamai tang 159 run ha ki 19 over. U Tim Seifert u la long u nongtied uba la tied bun da kaba kamai 52 run na ki 26 bol ryngkat bad u kapten u Mitchell Santner, uba la ïoh 43 run na ki 35 bol.
