Guwahati, Lber:
U Myntri Rangbah jong ka Tripura u Manik Saha, u la pynbna ha ka sngi Palei, ba ka jylla ka la rung ha ka jingïateh kular bad ka Guwahati Neurological Research Centre (GNRC) ban seng ïa ka jaka sumar kaba kham kyrpang ha Hapania ha West Tripura district.
Katkum ka jingong u Saha, ïa kane ka jaka sumar yn tei ha ka jaka kaba thylli kaba long trai da ka Tripura Jute Mills Ltd. U la bynrap ba ki ophisar na ka tnat ka koit ka khiah jong ka jylla ki la dep ban leit jngoh ïa ka GNRC ha Guwahati ban bishar bniah ïa ki jingtei bad ki jaka sumar jong ka.
U Myntri Rangbah uba peit ruh ïa ka tnad ka koit ka khiah um shym la ai jingtip shuh halor ka jingthoh jingkynmaw bad ka GNRC. U la ong ba ka sorkar jylla ka dang trei ruh ban kyntiew ïa ka jingshakri ha ka koit ka khiah bad ka jingdon ki nongtrei ha Govind Ballabh Pant Hospital (GBP Hospital) bad ha Agartala Government Medical College.
U Saha u la kdew ba ka jylla kham mynshwa ka la ïasoi ïa ka jingïateh bad ka AIIMS, New Delhi, ban kyntiew ïa ka jingshakri ha GBP Hospital. Hadien ka jingai jingmut jong ka AIIMS, la pynkiew ïa ki jingthiah ICU ha kane ka hospital na ka 156 sha ka 326.
Nalor kata, la ïasoh ïa ka GBP Hospital bad ka AIIMS lyngba ka Telemedicine, kaba ailad ïa ki nongpang ha Tripura ban ïoh ïa ka jingsumar kaba kham kloi bad kaba hashwa jong kiba wan na ki jaka ba jngai.
Ka ICU kaba don 16 jingthiah na ka bynta ki nongpang kiba shitom ha ka jingring bad ka Trauma Centre ICU kaba mynta ka la sdang treikam ha ka GBP Hospital ha ka sngi Palei. U Saha u la pynpaw ruh ba ka kynhun Myntri jong ka jylla ka la ïakren ïa ki jingthmu ban seng ïa ka skulbah sumar ban peit ïa ki kolej sumar bad kiwei kiwei ki jaka ai jingsumar ha Tripura.
U Myntri Rangbah ka jylla u la ong ba ka sorkar ka dang pynbha ïa ka koit ka khiah hapoh ka jylla ban pynduna ïa ka jingdonkam jong ki nongpang ban leit wad jingsumar shabar ka jylla Tripura. Mynta ka jylla ka don lai tylli ki kolej doktor, kiba ai 450 tylli ki jaka pule MBBS bad 119 tylli ki jingpule hadien ka kyrdan pule baroh.
Ha ka jingpyrshang ba kham mynshwa, ka sorkar ka la ïatreilang bad ki Srija Hospitals and Research Institute, Imphal, ban thaw ïa ka jaka sumar kaba kham tbit bad ka Medical College ha RK Nagar ha West Tripura.
