Shillong, Lber 08
Ka Shillong Lajong FC ka la khur ïa ka jingjop kaba nyngkong ha la ïing ha ka Indian Football League, hadien ba ka la pynliem noh ïa ka Real Kashmir FC da 2-1 kol ha ka sngi U Blei ha SSA Stadium kaba ha First Ground, Polo.
Kane ka nam jop ka la wan urlong lyngba ki kol ba la thep da u Vice Captain u Phrangki Buam lem bad u kapten u Kenstar Kharshong na ka bynta ban pynlong ïa kane ka kynhun ban khur ïa ki lai poiñ.
Kane ka jingïakhun ka la long kaba itynnad bad kaba ïakhaid bha ha kaba baroh ar tylli ki kynhun ki la ïakhun tyngeh na ka bynta ban khur ïa ka jingjop. Ka Real Kashmir ka la ïoh ban pynkhih jar nyngkong eh ha ka minit kaba 20 lyngba u Seijoseph Haokip. Watla ka Lajong ka la shah thep kol, hynrei kam shym la duh mynsiem bad ka la ïakhun tyngeh bad ka la ïoh ïa ka kabu ksiar ban pynphai lyngba u Phrangki Buam ha ka minit kaba 40 na ka bynta ban ïakhaid mar shi kol ha ka kylla step.
Hadien katto katne por ba la bteng ïa ka jingïakhun jong ka kylla miet, ka Lajong hapoh ka jingïalam u Virendra Thapa, ka la ïoh ban thep biang ïa ka kol kaba ar lyngba u Kenstar, u bym shym pynlehnohei ïa kabu ksiar ha ka minit kaba 57. Haduh kaba kut ka Real Kashmir kam shym la lah shuh ban pynphai bad ka la mad ïa ka jingshah rem.
Lyngba kane ka jingjop, ka la jam sha ka kyrdan ba-ar ha kaba ka la ïaryngkat mar 4 poiñ ryngkat ka Aizawl (kaba danglamkhmat) bad ka Chanmari, kaba don ha ka kyrdan balai.
Ka Lajong kan pynkhreh biang ïa kawei pat ka jingïalehkai ha la ïing pyrshah ïa ka Diamond Harbour ka ban long ha ka 14 tarik mynta u bnai.
