Shillong, Lber 08
Na ka por sha ka por ki kam shah thombor ki kynthei bad ïa ki khynnah kynthei ki ju jia hapoh ka Jylla kumjuh ha ka ri India baroh kawei, ban pynshlur, ban ai jinghikai bad ai mynsiem ïa ki kynthei, ka Mahila Arogya Samiti (MAS) Lumdiengjri ka la rakhe ïa ka sngi kyrpang jong ki kynthei lane ka ‘Women’s Day’ ha Lumdiengjri Community Hall.
Ka phang pdeng jong ka jingrakhe ïa ka Women’s Day 2026 ka dei, “ka hok, ka jingbishar hok bad ka kam ba dei ban leh na ka bynta baroh ki khynnah kynthei” ka MAS ka dei ka seng kaba trei ban kyntiew ïa ka koit ka khiah jong ki nongshong shong hapoh shnong pohthaw, kaba ïatrei ryngkat-ryngkat bad ka tnad ka koit ka khiah jong ka Sorkar bad kaba la ïoh jingkyrshan ruh na u Bah Paul Lyngdoh MLA ka West-Shillong Constituency.
Ha kane ka jingrakhe la wan ban ïashim bynta u Bah Tirot Suchiang, u Bah Willison Langngap u ba dei u Rangbah Shnong ka Lumdiengjri, ka Kong Florence Lyngdoh Mawphlang kaba dei ka DCPC East Khasi Hills, ka Dr Anita Jyrwa ka Joint Director SIRD, ki longkmie bad ki nongïalam jong ka MAS.
Ka Dr Anita Jyrwa ka ai jinghikai bad jingpynshai haba ïadei ka hok jong ki kynthei khamtam ki khynnah kaba la kren haba ïadei ka jingjur ki kam shah thombor ki longkmie bad ki khynnah kynthei ha ka Jylla bad ha ka ri hi baroh kawei kaba la ktah bad pynrit mynsiem shibun ïa ki kynthei.
Ka Kong Florence haba ai jingkren ka la kyntu ïa ki paidbah nongshong shnong ban ïa shimbynta ha ki jingïalang bapher-bapher kiba la pynlong da ka MAS bad ban ai ka jingïatreilang khnang ba ka jingdon kane ka kynhun kan long ka jingmyntoi ha ki paidbah nongshong shnong.
Ka la ïathuh ba tang hapoh ka East Khasi Hill don kumba 74 tylli ki Mahila Arogya Samiti (MAS) bad na kine tang 64 tylli kiba treikam, kiba ju pynlong ïa ki prokram bapher-bapher.
