Shillong, Lber 08
U President jong ka United State of America, U Donald Trump, ha ka sngi Saitjaiñ, ula jer kyrteng ïa ka Tehran ka nongbah jong ka Iran, kum ka “nongshahrem jong ki ri ha Middle East” hadien ba U President jong ka Iran, U Masoud Pezeshkian, ula panmap na ki ri ba marjan, halor ki jingthombor kiba la pynlong ha ka por ba ka ïakhun bad ka Israel bad ka America.
Ha ka jingthoh ha ka rynsan Truth, u Trump, u la thoh, “Ka Iran, kaba shah pynshitom haduh ka dujok, ka la pan map bad aiti noh ïalade sha ki para marjan jong ka kiba na Middle East, bad kular ba kan nym siat shuh ïa ki. Kane ka jingkular, ka dei tang namar ka jinghiar thma kaba khlem sangeh jong ka U.S. bad ka Israel.”
U Trump u la kam ha ka jingthoh jong u ha ka “social media” ba ka Iran ka “wad ban shimti bad ban synshar ïa ka Middle East”.
“Ka Iran kam dei shuh ka “nongthombor jong ka dong mihngi,” ha ka jaka kata, “ka dei ka la dei ka nongshah rem jong ka dong mihngi,” bad kan long haduh bun phew snem haduh ba kin da aiti noh lane, kaba kham lah ban long, kin da kyllon noh syndon!”, la ong u Trump.
Kumban shu kdew u President ka America u la pynpaw ïa kitei ki kyntien hadien ba u President ka Iran u la pan map ïa ki Ri kiba marjan hadien ka jingbym lah shuh ban pyni bor ha ka thma da kaba kular ban nym ther bom shuh ïa ki ri kiba marjan hynrei ka Iran kan nym pyndem pat ha ki nongshun.
