Ka ktien Khasi ka long ka ktien ki trai shnong trai muluk ka Bri u Hynñiewtrep, kata jong u Khynriam, u Pnar, u Bhoi, u War bad u Lyngngam. Baroh ki dei ki Khasi kiba shong basah hapoh Ri Lum Khasi naduh kulong kumah.
Ka ktien Khasi ha ka jingshisha ka la biang bha ban ithuh bad pynlong aiñ hapoh ka Jylla. Namar la pule hapoh ki Skul, ki College bad hapoh University ruh. Te balei dang ong ba ka ktien Khasi kan sa duh jait noh. Kaei mo ka daw ba pynlong ia ka ktien u paidbah Hynñiewtrep ba kan hiar bad jah noh.
Ban pynkhie im ïa ka ktien ka shong ha ngi ki trai shnong trai muluk, kata ban kren bad thoh ha baroh ki sign board hapoh ki shnong ki thaw da ka ktien Khasi ym dei ban thoh da ka ktien Phareng (English).Ki Dorbar shnong ki dei ban shim jingkit khlieh ba ïa baroh ki jingmaham hapoh shnong hapoh thaw dei ban thoh da ka Khasi ym ban thoh da ka phareng kum ka nuksa ym dei ban thoh, “Beware of Dog” hynrei dei ban thoh, husiar ioh shah dait ksew, lada baroh ki Dorbar shnong ha ri Khasi kin thoh beit da ka ktien khasi la jong, ngi ngeit ba ka ktien Khasi baieid jongngi kan ym jah hynrei kan kiew stet hapoh ka ri bad ym ba kan hiar ne duh jait noh.
Hynrei kan nang kiew katba dang mih ki sngi ki ïa hapoh ka Bri u Hynñiewtrep bad shabar ka ri Khasi ruh. Ban ong ba kan duh noh ka ktien la jong ym sngew lah ngeit da leilei ruh. Te khamtam ki shnong ki thaw naduh nongkyndong haduh ki jaka Sor dei ban thoh beit salonsar da ka ktien Khasi la jong. Kane kan ïarap ban kyntiew bad pynkiew stet ïa ka ktien Khasi la jong hapoh ka ri.
C. B. Iawphniaw
