Shillong, Lber 08
U Prof. Lakhon Kma u dei u nonghikai jong ka North-Eastern Hill University. u la kynnoh ba ka jingkuman ka Ministry of Education jong ka Sorkar Pdeng haba ïadei ban weng ïa u Vice-Chancellor ka la pynhiar dor ïa ka pule puthi bad kaba la paw shai kdar ba Sorkar Pdeng kam kheiñkor ïa ka thaiñ shatei Lam-mihngi.
“Ka jingbym weng ïa u Vice-Chancellor ba sniew ha kano-kano ka University ka pyni ba phi la pynhiar ïa ka pule puthi bad ba ïa ka jaka ai hikai phi la leh politik noh, phi pynlong pynban ban thep kam ïa ki briew ki bym lah ban ai jingshakri,” la ong Prof. Lakhon Kma.
U Prof. Lakhon Kma u la ong ba u Prof. Prabha Shankar Shukla u dei u bym lah ban trei kum u VC jong ka skulbah da kaba ong ba “Ban da dei ha kiwei ki jaka u Shukla lei um lah ban long wat tang kum u ‘headmaster’ jong ki Primary School ruh, katba hangne pat u wan kum u VC jong ka skulbah bad u la pynhiar ïa ka University.”
“Ka la don ka jingdawa ban weng ïa u Shukla, ka la don ka ruh ka ‘Inquiry Committee’ ban tohkit, hynrei na ka liang jong ka Sorkar kam kwah ban weng ïa u, kane ka kdew ba ka Sorkar kwah ban pynhiar, ym ban pynkiew ïa ka pule puthi bad kim phikir ïa ka jinghiar ka pule puthi hangne” la ong u Prof. Lakhon Kma.
Shuh-shuh u la ong ba lehse ka don kano-kano ka jingthmu barieh jong ka Sorkar ïa kaba ym lah ban sngewthuh bad ba ka kwah ban wanrah ïa kata ka rukom pynïaid ba na nongbah Delhi bad lehse da kaba wanrah ïa ki briew jongki, kiba long tang kum ki niang kohnguh kan long ka lad ban kyntiew ïa kita ki jingthmu jongki, hynrei kaba sngewsih pat ka long ba na kane ka jingleh jong ki, ka ktah bha ïa ka skulbah bad ïa ki khun samla kiba wan ban pule namar ba ki dei kiba wan na ka longïing longsem kaba duk ba jynjar bad lada ka University kam lah ban ai kaba bha ïa ki khynnah, kaei ka ban jia ïa ki ha ki por ban sa wan.
U Prof. Lakhon Kma u la ong ka NEHU la kumba 12 snem mynta ka la shu hiar na kawei ka snem sha kawei pat namar ka jingwan ki VC ki bym lah ban trei ïa ki kamram bad kiba ymdon ka thong, ka jingïohi jngai ban kyntiew ïa ka University bad ïa kaba la don ruh kim lah ban pyntreikam. Kane kan sa buh ha ka jingeh ïa ki ban wan ban shimti kum u VC jong ka NEHU, hynrei u la kyrmen ba ha ki por ban wan ka NEHU kan ïoh da u VC uba stad, u ba don ka thong ban kyntiew, uba la biang ki jingnang jingtip ha ka ban pynïaid kum u VC, khnang ba lah ban khylli biang ïa ki jingbymbiang bad ki jingduna kiba ka NEHU ka la hap ban ïakynduh ha kine ki snem ba la dep.
