Jowai, Lber 08
U Myntri ka tnad ka koit ka khiah Ma Wailadmiki Shylla ha ka 6 tarik Lber u la plie paidbah ïa ka 1st West Jaiñtia Hills Book Fair ha ka jingïadon lang u Deputy Commissioner Abhinav Kumar Singh, IAS ha District Library, Mynthong Jowai.
U Ma Wailadmiki Shylla ha ka jingkren u la pynpaw ïa ka jingdonkam ban pynroi ïa ka jinglong bad pynmlien ban pule kot khamtam ha kane ka juk mynta kaba jur bha ka jingïakhun.
U la kdew ba ka Digital Learning Centre kaba dang plie thymmai ryngkat bad ki jingpynbha ha District Library kan ailad ïa ki samla pule bad ïa ki paidbah nongshong shnong ban ïoh ïa ki lad jinghikai kiba kham bha.
U la kdew ba kane ka jingthmu kan pynlah ïa ki samla pule ban tip, ban ïoh ïa ki jingtip ba thymmai bad ban pynïar ïa ka jingtip jong ki sobjek bapher bapher.
U la pynpaw ruh ka jingïaroh ïa u Deputy Commissioner Abhinav Kumar Singh na ka bynta ka jingkyrshan ïa ki prokram bad ki jingthmu ba ïadei bad ki samla hapoh ka distrik.
U Myntri u la pynpaw ba ki prokram kum ka Book Fair ki don ka bynta kaba kongsan ban pynshlur ïa ka pule kot hapdeng ki samla.
Haba pynshlur ïa ki samla pule ban pyndonkam hok ïa ki lad jingïarap, u la kyntu ïa ki ban pyndonkam pura ïa ki lad jingïarap ha ka Digital Learning Centre ban pynkhreh ïa ki eksamin ba ïakhun bad ban ïoh ïa ka jingjop ha ka kyrdan kaba ha khlieh duh.
U Deputy Commissioner Abhinav Kumar Singh u la pynpaw ïa ka jingdonkam jong ka 1st West Jaiñtia Hills Book Fair, kaba la pynlong ha ka sien kaba nyngkong ha ka District kum ka rynsan ban pynshlur ïa ka jingpule ban pule kot bad ka jingpule hapdeng ki samla. U la pynpaw ba ka jingthaw ïa ka jaka hikai digital kan ailad ïa ki samla pule bad ki nongshong shnong ban kham ïoh ïa ki lad jinghikai digital.
U la ai khublei ruh ïa ka jingpyni dur bad jingdro dur kaba pyni ïa ka jingriewspah jong ka district – ka riti dustur, ka art bad ka kolshor. U Deputy Commissioner u la pynshlur ïa ki samla pule ban pyndonkam ïa ki lad jingïarap bad ban ïashim bynta shitrhem ha ka prokram jong ka Book Fair.
Ïa kane ka Book Fair la pynlong da ka ophis jong u Deputy Commissioner, West Jaiñtia Hills District ryngkat ka jingïatreilang bad ka Owl Library Initiative hapoh ka Kyrshan Foundation, kaba la bei tyngka lyngba ka CM Catalytic Fund- Celebrating Literature, Culture bad Community.
Ha kane ka sngi u Myntri u la jurip ruh ïa ki stall bad ïakren bad ki nongpynmih kot bad ki seng kiba ïashim bynta.
