Mairang, Lber 08
Ka Rilang CC ka la ïoh ban rah ïa ka nam lahduh ha ka lympung ïalehkai kriket ba la tip kum ka 4th Eastern West Khasi Hills District T20 Cricket Tournament ba la pynïaid da ka Eastern West Khasi Hills District Cricket Association, hadien ba ka la pynliem noh ïa ka Mawshut CC da 74 run ha ka sngi Saitjaiñ ha madan ïalehkai jong ka Khadsawphra College Mission Mairang.
Kane ka jingïakhun final ka la long kaba itynnad ha kaba la wan ban sakhi lang da u Secretary ka Meghalaya Cricket Association (MCA) u Bah Rayonald Kharkamni kum u kongsan ha ryngkat ka jingdonlang u Principal ka Khadsawphra College u Bah Boldness Nongum, u Sordar ka shnong Mission u Bah Beltisar Rani, President ka synjuk bad kiwei.
Haba phai sha kane ka jingïakhun final, ka Rilang kaba la jop ïa ka kynting pisa, ka la kamai 144 run ha ki 20 over. Haba wan beh ïa ka thong ka Mawshut CC ka la kamai tang 70 run hadien ba ka la shah pynkhyllem baroh ki nongtied na ka daw ka jingïalehkai bha ki nongkawang bol ka Rilang.
Ïa ka khusnam Player of the Match la khur da u Khraw Marngar, uba la khur ïa ka nam Highest Wicket Taker, katba ka nam Player of the Tournament ka leit sha u Paiaemdor L.Mawnai uba la ïoh 9 wiket bad 130 run, ïa ka nam Highest Run Scorer la ïoh da u Bhakupar Mylliemngap, Emerging Player U- 19 ka leit sha u Damebankupar Marbaniang, katba ha ka U-23 la ïoh da u Gabriel Thabah.
Te kumta ka Rilang kum ka lahduh ka la khur ïa ka khusnam pisa kaba T. 30,000 tyngka, katba kaba wan ba-ar ka la ïoh T. 15,000 tyngka.
