Shillong, Lber 08
Ki samla jong ka Balang Presbyterian Achik na Rajapara, kaba don markhap bad ka ri Bangladesh kaba hap ha South West Khasi Hills District kaba hap ha Mawphlang Presbytery, Riwar Sepngi District ka la ioh ban rwai pynrhem mynsiem ia ki riewngeit kiba la poi ha ka jingiaseng paidbah jong ki rangbah ka Khasi Jaiñtia Presbyterian Synod Sepngi kaba la long ha Balang Presbyterian Rangshken, Mawphlang Presbytery kaba la kut mynta ka sngi.
Kine ki samla Achik na Rajapara ki la riam tynrai jong ki da kaba rwai da ka ktien lajong kaba tip kum Garo bad pynkut pat da ka jingrwai khasi kaba ong, “mynsiem jong nga to iaroh ia u trai”.
Haba ki samla Achik ki la ieng ha rynsan ban rwai, ki riewngeit kiba bun kiba shong ha madan ki la ieng ban peit namar ka dei ka sien kaba nyngkong ba kiba rwai choir na kiwei ki jaidbynriew kin rwai ha jingiaseng KJP Synod sepngi ne wat kiwei ki synod kiba don ha rilum khasi jaintia.
Ha kane ka jingiaseng synod, la antad kumba ar lak ngut ki riewngeit kiba la poi ban iakynduh shisien shisnem.
Kane ka jingiaseng Synod sepngi kaba arphew saw sien kaba la sdang naduh ka 5 tarik Lber 2026 kaba la pynkut mynta ka sngi ka 8 tarik Lber 2026.
Ha ka jingiaseng kaba nyngkong kaba dei ha ka por 10:30 mynstep la sam ia ka ktien jong u Blei da u Pastor W.P Marbaniang bad ha ka jingiaseng kaba ar sien kaba dei ha ka por 1:30 nohphai sngi la sam ia ka ktien u Blei da u pastor BR Pamshong uba dei u pastor rangbah na Ribhoi Presbyterian Synod.
U pastor Pamshong u la ong, haba phai sawdong ka pyrthei,u iohi tang bym suk suda, namar kane ka pyrthei ka bym hun bad tharai sniew kaba poi sha ka thma, ka pyni ka jingsynshar ha ki ri ka pyrthei bad ka jingbym suk, hapdeng ki jaidbynriew baroh. U la ong kiwei ki sngewshyrkhei ia ka jingduk, kiwei ki khuslai ha jingpang jingshitom, kine baroh ki buh ia u briew ha jinglygnngoh ba khraw bad jingsheptieng ka jingim. “Hapdeng ka jinglong ka pyrthei nga don ka khubor ban iasyllok ban phai sha u Blei ha ka jingduwai, namar ngi ki briew ngi don ki jingeh bad ha jingialeh kaba ngi iakynduh”u la ong.
U pastor Pamshong u la pynshong nongrim na kitab Habakkuk ka lynnong kaba 2 ka dkhot kaba nyngkong, “ngan ieng ha la jingap phira ngan shong halor ka kut, ngan ap khmih ban iohi un kren aiu ha nga bad kawei ngan phaiktien shaphang ka jingud jong nga.
U la batai ba ka iingap phira ka dei ka jingduwai, ka jingiakynduh kyrpang u briew bad u blei la haba marwei ne haba donlang haba bun.
La pynrhem ia kane ka jingiaseng naduh ka por 10:30 mynstep da ki jingrwai ka jingiaseng khynnah Balang Rangshken, Standing choir Mynnar Presbytery, Standing Choir Nongrymmai Presbytery, Standing choir Mawphlang Presbytery.
Ha jingiaseng kaba 1:30 baje nohphai sngi la ioh jingrwai da ka Standing choir Nongsynrieh Presbytery, Balang Achick Presbyterian Rajapara, KJP Synod Standing choir.
