Shillong, Lber 08
Ka Shillong Cricket Association (SCA) kan sdang ïa ka lympung ïalehkai 1st (L) PA Sangma Memorial T20 Tournament ha ka lah sngi U Blei ha madan ïalehkai kriket jong ka MCA ha Polo.
Ïa kane ka lympung la kyrdan da ka PA Sangma Foundation bad la jer kyrteng na ka bynta ban pynsah kynmaw ïa u Myntri Rangbah barim ka Jylla, u MP bad kum Lamphang ka Lok Sabha.
Ha kane ka lympung yn shim bynta da 18 tylli ki kynhun kiba na kane ka nongbah lem bad ar tylli kiba na Guwahati bad yn phai ïa ki ha ki saw tylli ki group. Ka lahduh ha kane ka lympung kan ïohpdiang ïa ka khusnam kaba T.1 lak tyngka bad kaba wan ba-ar kan ïoh T. 50,000 tyngka.
Ki kynhun kiba don ha ka Group-A ki long ka City Capital, Sporting CC, Sputnik CC, Meghalaya Police & Mawsyiem CC. Ha ka Group-B ki long ka Rhino Land, Nongmensong CC, Sputnik Spartans, Lok Bhavan & Shillong Sixers. Group-C ki kynthup ïa ka Champions of SCA Super Division (to be decided Saturday), Lawsohtun CC, Young Guns, United XI & Cluster CC. Ha ka Group-D ki long ka Runners-up of SCA Super Division (to be decided Saturday), Donkins CC, Langsning CC, Winds CC & Metallica Rising CC.
Ki kynhun ki ban ïalehkai mynta ka sngi ha ka Group-C kin long hapdeng ka Lawsohtun CC pyrshah ïa ka Cluster CC ha ka por 8:30, katba ha ka Group-A ka Sporting CC kan ïakynduh pyrshah ïa ka Meghalaya Police ha ka por 12:30 nohphai sngi.
