Shillong, Lber 08
Ka eksam kam Peon ba la khot pynlong da ka District Selection Committee (DSC) ka East Khasi Hills ha ka 07 tarik u Lber, 2026, ka long kaba ïaid beit ha kiba bun ki jaka hynrei dei tang ha ki ar tylli ki jaka thoh eksamin ba la don pat ki katto-katne ngut ki samla ki la hap ban phai noh da ka jingïamrem namar kim ïoh shuh ban rung shapoh ka jaka thoh eksam.
Ki samla kiba thoh ïa katei ka eksamin kidei kiba la wan na kylleng ka East Khasi Hills bad kane la pynlong ha ka step jong ka 07 tarik (Sngi Saitjaiñ) u Lber 2026, bad ki katto katnne ngut ki samla kiba la duh ban thoh ïa ka eksam ki dei kiba leit thoh ha Shillong Jail Road BVoys HSS bad ha Khasi Jaiñtia Presbyterian Higher Secondary School, kaba don ha Jaïaw tang na ka daw jong ka jingbym sngewthuh sngewthaw ka jong ki ïa ka por ba la buh da ka DSC.
Kine ki samla ki la poi sha kitei ki jaka ha ka por kumba 8:45 kata 9 duna ei-ei bad haba ki poi ha kitei ki jaka, ki nongpynïaid kynthup kiba hap ha phalor, ba kin nym ïoh shuh ban rung ba ka por ka la palat bad ban pynshai ba kat kum ba la thoh ka admit card, kiba thoh eksamin ki hap ban report shiteng kynta shuwa ka por ban thoh ïa ka eksam.
Katkum ki samla ba wan thoh eksam ki la ong ba la buh ba ka por sdang thoh eksam lane ka Witten Exam na ka bynta katei ka kam ka long 9 baje mynstep bad ban pynksan ba baroh napdeng jong ki, ki la poi shuwa ka por kata khyndai duna.
Ki samla kiba la pynpaw ïa ka jingdiaw mynsiem namar ka jingduh thoh eksamin ha Shillong Jail Road Boys HSS bad ha Khasi Jaiñtia Presbyterian Higher Secondary School ki ïa don 30 ngut sha jrong bad ki dei kiba wan najan bad na sha jngai.
