Shillong, Lber 08
U Myntri Rangbah ka Sorkar Jylla u Conrad K Sangma u la plie paidbah ïa ka’Locality Beautification Project’ ka projek ban pynitynnad, pynkylla dur ïa ki jingtei bad ki jingdonkam ha ka shnong Nehru Ading ha Hawakhana, Tura ha ka jinglud kaba kot palat T. 700 klur.
Kane ka projek ha Nehru Ading ka dei kaba la pyntrei da ka Nehru Ading Development and Welfare Committee (NADWC) ban pynitynnad ïa ki sawdong sawkun bad ki jingtei ba kongsan jong ka Shnong. U Conrad u la plie ruh ïa u mawthoh kyrteng ban pynsah jingkynmaw ïa kane ka jingplie ïa ka projek, ha ka jingïalang ba la long ha Old Church Campound.
U Conrad haba ai jingkren sha ki nongshongshnong u la ong ba ka Tura ka la sakhi ïa ka jingkylla suki-suki lyngba ki kam pynroi ba bun jait, watla bun ki kam kiba dang sah bad ym pat lah ban pyndep. “Ki kam pynroi bapher-bapher ha ki kyrdan bapher-bapher, ha ka jingpynlud kaba kot palat T.700 klur la pyntrei na ka bynta ka roi ka par hapoh ka sor Tura.”
Haba kren ïa ki projek hap hapoh jong ka ‘Smart City Mission’ u Myntri Rangbah u la ong, kumba T.60 klur la ai ban shna ïa ki surok shnong ha ki kyntoit bapher-bapher. Nalor kane, T.15 klur la dep ban pynlut ha ka wat ba nyngkong na ka bynta ki ‘street light’ bad ki kam pynitynnad jaka, katba sa T.15 klur la dep ban mang ban pynitynnad ïa ka ïew Tura.
U Conrad u la kdew ruh halor ka ‘City Beautification Drive’ kaba dang ïaid shakhmat, ha kaba la buh ïa ki kor CCTV Camera bad ki ‘streetlight’ ha kylleng ka sor. “Ki kad liengsuiñ, ki 5 Star Hotel, ka jingpynïasoh ïa ki surok, ki CCTV network bad ki jingshai ha surok baroh ki long kiba kongsan bad kiba kongsan bha kaba donkam ruh ban rah ïa ka kyrdan jong Tura sha kaba kham shalor.
U la ïathuh, haba ïadei ka jingpynitynnad bad ka jingshngaiñ ki paidbah ha ki jaka sor, la dep ban pyndait kumba 350 tylli ki kor CCTV Camera bad kumba 500 tylli ki ‘streetlight’ bad kane ka long shi bynta ka sienjam ba bha bad ka jingthmu ban pynjanai ïa ki jingtrei ha kylleng ka sor Tura.
U la kyntu ruh ïa ki nongshong shnong ba kin trei shitrhem ha ka ban pynneh ïa ka jinglehkhuid lehsuba da kaba ban jur ba ka jingïashim bynta lang ki paidbah ka long kaba kongsan bha na ka bynta ki kam pynroi.
Ki nongshongshnong ki la ïoh ruh ka lad ban pynsngew ïa shibun ki jingeh kiba ki ïa kynduh ba kynthup ïa ka jingdonkam ban don ka ‘Community Hall’, ka jingshna ïa ka kynroh ha Hawakhana Govt LP School, ka jingmaramot ïa ka ïingskul bad ka jingpynpoi um sha ki skul SSA ka thaiñ bad kiwei-kiwei.
