Nongpoh, Lber 08
Kum shi bynta ban kyntiew ïa ki kam thir ksai bad thaiñ jaiñ, ka ophis jong ka District Handloom Officer ka Ri-Bhoi District mynta ka sngi, ka la lah ban pynlong ïa ka prokram kaba la ai kyrteng ‘Looms & Links’ ka ban long ka rynsan na ka bynta ki nongdie nongthied, ki nongthaiñ bad ki paidbah hi baroh ban ïakynduh bad pynïaid ïew ïa ki jaiñ Ryndia.
Ïa kane ka prokram kaba shi sngi lynter, la pynlong ha Integrated Textiles Tourism Complex, Nongpoh ha kaba la wan ban ïadon ryngkat da u Bah Fredrick Roy Kharkongor, Principal Secretary ka tnad Textiles kum u kongsan, u Abhilash Baranwal Deputy Commissioner ka Ri-Bhoi kum u Symbud Kongsan, u Bah Daniel Syiem, Fashion Designer ba pawnam ka Jylla nalor kiwei-kiwei de ki heh ophisar, ki nongthaiñ jaiñ, ki nongthir ksai kiba la wan na kylleng ka Jylla.
Haba ai jingkren ha kane ka sngi, u Bah Daniel Syiem uba dei u Fashion Designer ba la pawnam ka Jylla u la ïathuh halor ka jingïaid lynti jong u kumno ba u poi sha kane ka kam ban suh ïa ki jaiñ phong bapher-bapher lyngba ki jaiñ Ryndia kiba la pynmih da ki nongthaiñ jaiñ ka Ri-Bhoi kaba la sdang ar phew snem mynshwa lyngba ka jingai jingmut bad jingai mynsiem jong uwei na ki ophisar Sorkar uba la Bam Kwai ha Dwar U Blei ha ki khyndiat snem ba la leit noh.
U la ong ruh ba ka jingthmu ka jong u hi kam dei satia ban long tang uta u nongpynwandur ïa ki jaiñ phong, hynrei ka jingthrang ka jong u ka long ba un pynïoh ïa ki nongthir ksai, ki nongthaiñ jaiñ ïa ka kamai kajih kaba biang lyngba kane ka kam, ba kin lah ban kyntiew ïa ka ïoh ka kot jong ka ïing ka sem bad ka imlang ka sahlang.
Na ka liang u Bah Fredrick Roy Kharkongor u la pynpaw ïa ka jingsngewkmen ba ka Jylla ka kam thaiñ jaiñ ka la nang kiew ha ka Jylla. U pynpaw ruh ïa ka jingkmen ba Jylla ka lah dep ban ïoh ruh ïa ka ‘GI Tag’ ha kaba ïadei bad ka jaiñ Ryndia ban pyn-i ïa ka jinglong trai ka jong ka ïa kane ka jait jaiñ kaba la thaiñ bad wieh rong da ki mar ki bym shym la khleh dawai.
U la ïathuh ba kumba long mynta, ki don palat da ki lakh ngut ki nongshong shnong ka Jylla kiba im ja lyngba ki kam kiba dei bad ka jingthaiñ jaiñ Ryndia hynrei kumba long long mynta ïa ki jingsop Ryndia la rah sha ka Jylla Assam ban pynkylla ksai bad hadien la wanrah biang sha ka Jylla, kumta ka jingthmu bad ka jingthrang jong ka tnad Textiles hi ka long ban thaw ksai hi hangne ha ka Jylla lyngba ki sop Ryndia kiba pynmih da ki nongrep.
U la pynpaw ruh ïa ka jingkyrmen ba lyngba ka jingïatrei bad snohktilang jong baroh kiba ïadon bynta, khlem pep kane ka kam kan nang kiew bad kynjoh sha ka thong kaba kham shajrong kat nang wan ki sngi ki por.
Ha kane ka sngi, la pynlong ruh ïa ka jingïamir bad ïatai jingmut hapdeng ki nongthaiñ jaiñ, ki nongthir ksai, ki nongpynwandur ïa ki jaiñ phong (Fashion Designer) lem bad ki ophisar ka tnad Handloom ba kumno kin dang ïoh jingmut shuh-shuh ban pynbha ïa ka rukom pynmih ïa ki jaiñ jong ki bad ruh ba kin lah ban pynïaid ïew ha ka dor kaba biang.
