Shillong, Lber 08
Kawei ka longïing ba sah riewkynthei lem tang ki khun ki ksiew, kiba don napdeng jong ki, dei ki khunswet ha Mynthong, Jowai ka la pdiang da ka ïing thymmai ba paka ba la pynshna sngewbha da ka Rotary Club Jowai kaba dei ka seng-treimon sngewbha ïa ka bha ka miat ka imlang sahlang ha ki bynta bapher-bapher.
Kane ka ïing dei jong ka Kong Ribil Pyrtuh ha kaba ki ïa sah phra ngut kynthup ki khun jong ka bad ki ksiew ruh kumjuh.
Ha ka ïing barim, ka don tang lai kamra bad hadien ba la shna pynthymmai pat ka la mih 4 kamra nalor ka jaka sum bad paiñkhana.
Ia kane ka ïing la wan ban plie da u Bah Wailadmiki Shylla, MLA ka Jowai uba dei ruh u Myntri ka tnad ka koit ka khiah bad sports ha ka jingdonlang u President ka Rotary Club Jowai, u Rotarian Rueveny Nong-tdu, u Secretary u Rotarian Montri Passah, u Rangbah Shnong Mynthong, u Bah Lamphrang Pohktai nalor kiwei pat ki dkhot ka Club bad ki dkhot ka dorbar shnong.
Ha ka jingïalang lyngkot ba la pynlong ha Community Hall ka dorbar shnong Mynthong, u Rotarian Rueveny Nongtdu u la pynpaw jingsngewnguh ïa baroh kiba don bynta ban pynjop ïa kane ka kam naduh ki para dkhot bad kumjuh ki paralok jong u kumba ka phang pdeng hi jong ka Rotary International ruh ka ong “Unity For Goods”.
U Bah Wailadmiki Shylla haba kren u la ïaroh ïa ka jingïohi jngai ka Rotary Club ban kner ki lad jingïarap namar kam dei shuh ka sien ba nyngkong ba ka ai jingïarap hapoh ka District bad ka Jylla.
U la ong ruh ba ka jinglong ïa tylli bad ai nuksa ïa ki wei haba don shisha ka jingthrang angnud ban leh ei-ei, lah beit ban pynurlong lada don ha kano kano ka rynsan ruh
