Shillong, Lber 08
Ka Rangkynsai SC ka la long ka lahduh ha ka Super Division Cricket League 2026 ba la pynlong da ka Shillong Cricket Association (SCA), hadien ba ka la pynliem noh ïa ka Royal CC da 6 wiket ha ka jingïakhun final kaba la long ha ka sngi Saitjaiñ.
Ha katei ka jingïakhun ka Royal ka kam trai ban tied nyngkong ha kaba ka la kamai 172 run bad shah pynkhyllem baroh ki nong-tied ha ki 25.2 over. Kane ka la wan urlong lyngba ka jingïalehkai bha ki nong-kawang bol kata u Aryan Borah, uba la khur 5 wiket bad ïa ki 2 wiket da u Adarsh Joshi. Katba ki nongtied ka Royal, u Rajesh Tati u la khyrwit ïa ka shiteng spah kaba 63 run na ki 49 bol bad u Tarique Siddique u la ïoh 17 run na ki 8 bol.
Haba wan shimti ïa ka pali kaba ar, ka Rangkyn-sai ka la lah ban kynjoh sha ka thong da kaba kamai 175 run bad shah pynhap 4 wiket ha ki 38.2 over. U Heiyomiki Ryng-khlem u la long u rangïa-lehkai ba kynsai ha kaba u la ïoh ban khyrwit 69 run na ki 87 bol lem bad u Joydeepan Deb uba la tied 51 run na ki 82 bol. Katba u Raj Biswa bad u Reshabh Dipak ki la khur mar 2 wiket na ka bynta ka Royal. Ïa ka nam Player of the Match la khur da u Aryan Borah.
Lah ban kdew ka Rangkynsai ka la long ka kynhun kaba khlem shah rem naduh kaba sdang ha kaba ka la khur jingjop baroh saw sien ha ki jingïalehkai jong ka Group-B. Kumjuh ha ka semi final ka la jop ïa ka Nongmynsong CC da 45 run hashwa ban kan pynliem sa ïa ka Royal.
