Shillong, Lber 08
U Myntri Rangbah ka Jylla u Conrad K Sangma u la ïashim bynta ha ka jingïalang ban sam ïa ki shithi thungkam sha 2968 ngut kiba ïoh ban rung kam thymmai hapoh ka Meghalaya Police ha ka 2nd MLP Battalion kaba dei ka jingpynrungkam kaba bun tam ha ka tnad pulit jong ka Jylla.
Ka jingthep kam ba heh tam ka ïaid sha ka Armed Branch Constables bad kiwei kiwei ki bynta ba don haduh 1494 tylli ki kam bud sa ka Unarmed Branch Constables kaba don 720 tylli ki kam. Kiwei kiwei ki kam ki kynthup ïa ka MPRO Operators 205 tylli kikam bad ka Firemen 195 tylli bad kiwei de ki post kiba tam na kane ki kynthup ïa kiwei de ki bynta ba kongsan kum ka UBSI, Driver Fireman, Driver Constable bad kiwei kiwei ki operator bad Mechanic post.
Haba kren ha katei ka jingïalang, u Myntri Rangbah u la ong ba kane ka jinglehburom ka long kaba sah kynmaw kaba thaw histori ruh ha ka Jylla. “Kane ka lah ban dei ka prokram kaba heh tam haba ïadei ka jingsam ïa ki shithi thungkam. Kum ka Sorkar ka sngew ba ka dei shisha ka khyllipmat kaba ngi sngew sarong,” u la ong.
U la kdew ba katei ka jingpynrungkam ka long kawei na ka kam kaba khia bha, ha kaba ki bor ba dei peit ki hap ban jied na ki 1.7 lak ngut ki nongthep kam. “Palat 17,00,00 ngut ki nongthepkam ki don bad mynta tang 3000 ngut kiba ïoh ïa ka shithi thung kam bad kiba lah ban rung sha ka kam.”
Haba kren shaphang ka jinglong kyrpang katei ka sngi sha ki nongïoh kam bad kiba ha ïing ha sem jong ki, u Myntri Rangbah u la ong ba kane ka jinglehburom ka kdew ïa ka jingsdang bad ka jingkitkhlieh ka ban neh slem ha ka jingim jong ki.
U la kren ruh halor ka bynta ka kongsan jong ki pulit ha ka synshar khadar bad ka roi ka par jong ka Jylla. “Na ka bynta ka imlang sahlang bad ka Sorkar, ka roi ka par ka long kaba donkam. Hynrei khlem ka aiñ ka kyndon, ka roi ka par kam lah ban ïaid shakhmat,” u la ong
U la kren ruh shaphang ka jingdonkam jong ki uniform, “Shen, phin sa phong ïa ki uniform, hynrei kynmaw ba kine ki uniform kim dei tang ki jaiñphong. Haba ki briew ki ïohi ïa ki uniform, kin sngew burom, kin sngew shlur bad sngew shaniah. hynrei ki briew kin dei ban tip uba phong ïa katei ka uniform u ïeng na ka bynta ka hok bad ka jingshisha,” u la ong.
Haba pynkynmaw ïa ka jingkylla ha ka kam pulit, u myntri u kyntu ïa ki nongïohkam thymmai ba kin lah ban iaineh bad aiti ïalade ha ka jingshah hikai. U la ban ruh ïa ka jingdonkam ban pynryngkat ïa ka bor bad ka jingsngewrit. “Katba phi dang ïeng skhem bad kut jingmut ha ka ban pyntreikam ïa ka aiñ, phi dei ruh ban bat ïa la ka jingsngewrit. Ki briew kiba phin shakri ki dei kum ki hynmen ki para jong phi bad kawei na ka kamram ba kongsan jong phi ka dei ban ïaid ryngkat ka aiñ bad ka jingjemnud ruh kum ki heh pulit,” u la ong.
U Myntri Raangbah u la pynbna ruh ba ka Sorkar ba mynta kan jam sha ka 8 snem ka jingtreikam jongka. “Ha kine ki 8 snem ba la dep, la jan 11,000 tylli ki jingthepkam ki la ïaid hapoh jong kane ka Sorkar bad ngin ïaid shakhmat ban pyntikna ba kiwei de ki kam ba dang lait ruh yn thep noh kloi ha ki sngi ban wan,” u la ong.
U Myntri Rangbah u la ai ka jingkhublei ïa ka Director General of Police ka Kong Idashisha Nongrang kaba la ïalam khmat ïa ka tnad pulit kaba la trei shitom ha ka ban pynkhlaiñ ïa ka ka tnad pulit hapoh jong ka Jylla.
U Symbud Myntri Rangbah u Bah Prestone Tynsong haba ai jingkren ha ka jingïalang u la ai ka jingkhublei kitbok kitwriang ïa baroh ki nongïohkam bad pynpaw ba ka jingioh jong ki ïa ka kam ka long namar ka jingjop bad ka jingtrei shitom jong ki.
“Phi la mih shakhmat kum ki biang tam na kiba bun ha ka jingthung kam. Phi long ka jingkyrmen bad ki nongai mynsiem ïa ka Jylla Meghalaya bad phi don mynta hangne namar phi dei kiba bit tam,” u la ong.
U la pynshlur ïa ki katba ki dang sdang ha ka kam jong ki bad pynkynmaw ruh ïa ki kamram ba don ha khmat jong ki “Naduh mynta ka sngi, ka kamram jong phi ka la sdang. Aiti ïalade ba ki jinghikai bad ki
jingshakri bad barobor kynmaw ïa la ka kamram ban shakri ïa ki paidbah ka Jylla Meghalaya da ka hok bad ka jingsngewrit,” u la ong.
U Bah Tynsong u la ai mynsiem ïa baroh ki nongthep kam ba ka rukom thungkam kan ïaibteng ban long kaba hok bad bakhuid. “Kam don kano-kano ka jingshah shiliang, baroh ka shong ba ka hok jong ki,” u la ong bad bynrap ba ki jingthunkam kan sdang shen ban pyndap ïa ki jaka ba dang donkam.
