Shillong, Lber 08
Ha ka jingpyrshang ban ai mynsiem ïa ki khynnah kiba wan na ki longïing kiba duna ha ka ïoh ka kot ba kin bteng ha ki jingpule jong ki, haduh ki kyrdan kiba kham shalor, Ka Khasi Students’ Union (KSU) West Khasi Hills District Unit, ka la kner jingïarap da kaba kyrshan skul ïa 10 ngut ki khynnah, kiba kynthup ïa ki kynthei bad shynrang, kiba na katei ka District, ha ka jingïalang kaba la pynlong ha ka hall ka ophis BDO Nongstoiñ C&RD Block.
Ha ka tei ka sngi, la ïadon lang da u Samla Franklin Syiemïong, General Secretary ka KSU, West Khasi Hills District, u Samla Copperfield Khardewsaw, Education Secretary bad kiwei-kiwei de.
Haba ai jingkren ha kane ka jingïalang, u Samla Franklin u la ong ba kane ka sienjam ka long ban kyrshan ïa ki khynnah kiba thrang ban pule bad kiba don ïa ka thong na ka bynta ka lawei jong ki.
U la ong ba ka daw ba ka KSU ka shim ïa kane ka sienjam kaba hakhmat eh ka dei ban synñiang lem bad nym klet bad ban kynmaw lem ïa ki paradoh parasnam kiba donkam ka jingïarap.
“Ngi ïoh ban kyrshan skul ym dei ba ka seng ka riewspah ne bun pisa hynrei ka daw ba ngi lah dei ba ki nongïalam jong ka District ngi ïa sei pisa khyndiat khyndiat ban pyndap pisa. Nalorkata ki don ruh ki paradoh parasnam kiba la ïarap bad noh synñiang da ka pisa,” la ong u Samla Franklin.
Kumta u la kyntu ïa baroh ki khynnah skul ba kin trei shitom ha ka ban pule puthi na ka bynta ka lawei ka ban dangwan baroh.
