Shillong, Lber 08
U Myntri Rangbah ka Jylla u Conrad K. Sangma u ai khublei ïa ka Sanfida Nongrum halor ka jinglah ban thep ïa ka kol kaba nyngkong eh ha ka AFC Women’s Asian Cup bad u la pynbna ruh da ka khusnam pisa kaba T. 2 lak tyngka na ka jingïarap ba kyrpang jong u ka ban wan lyngba ka Chief Minister’s Special Grant.
Lah ban kdew ka Sanfida ka dei ka ‘thei ïalehkai ba nyngkong eh na ka Jylla ban don ha kane ka kyrdan ïalehkai (senior) jong ka India bad ka la ïoh ban thep ïa katei kaba nyngkong eh jong ka ha ka jingïakhun pyrshah ïa ka Vietnam ha ka jingïalehkai kab nyngkong jong ka Group-C myn ha ka 4 tarik ha Perth, Australia.
Te kumta katei ka jingïoh ban thep kol ha ka AFC Asian Cupo ka la long ka jingsah kynmaw bad ka jingsarong ïa ka Jylla hi baroh kawei namar watla ka India ka la shah rem da 2-1 ha ka Vietnam, hynrei kane ka long pat kawei ka lad ba ka India lyngba ka Sanfida ka la ïoh ban pynkhih jar biang ha kane ka lympung hadien 23 snem kata ha ka Women’s Asian Cup jong u snem 2003 hashwa ban kha ïa ka Sanfida.
Kumba ka long mynta ka India ka la don ha ka kyrdan ba shatrai ha kane ka group bad kam pat shym la lah ban kamai point bad ha ka sngi Saitjaiñ ka la shah rem haduh 11-0 kol ha ka Japan ha Perth Rectangular Stadium kaba ha Australia.
Ka India kan pynkhreh ïa ka jingïakhun ka ban wan pyrshah ïa ka Chinese Taipei ha ka sngi Ba-ar.
Kumba paw tang ar tylli ki kynhun na kawei pa kawei ka group lem bad ar tylli ki kynhun kiba kynsai ki ban don ha ka kyrdan balai kin ïoh rung sha ka quarter final. Katba ki kynhun kiba rung sha ka semi final kin ïoh rung sha ka FIFA Women’s World Cup 2027 ka ban long ha Brazil.
Ka Sanfida ka dei ka ‘thei ïalehkai kaba la san lyngba ka shlem ai jinghi-kai jong ka Royal Wahing -doh. Ha ka aïom ïalehkai 2020-2021 ka la ïalehkai na ka Bangalore United FC, hadien ka la ïasoh sha ka Sirvodem SC (2021-2022), Sports Odisha (2022-2023), Garhwal United (2023) bad ka leit ïasoh (loan) sha ka Misaka United FC (2025-2026).
