Shillong, Lber 08
U Myntri Rangbah ka Jylla u Conrad K Sangma ha ka Sngi Saitjaiñ u la buh mawnongrim na ka bynta ban shna ïa ka Mini Stadium ha Mangsang ha ka mang tyngka ba T. 4.73 klur bad ban pynbha, pynthymmai ïa ka Mangsang Primary Health Centre (PHC) ha ka mang tyngka ba T. 2.98 klur.
Kane ka Mini-Stadium ka ban sa shna lyngba ka tnad Sports and Youth Affairs, kan pynkhlaiñ ïa ki kam ïalehkai ha katei ka thaiñ bad ban ailad ïa ki samla ban ïoh ïalehkai bad ïoh shim bynta ha kiba bunjait ki jait jingïalehkai, ka projek ka kynthup ïa ka jingpynbha ïa ka jaka ba la don lypa kaba la shna da u P. A. Sangma.
Haba ai jingkren ha ka jingïalang, u Conrad u la pynkynmaw ïa ka jingïadei jong u bad katei ka thaiñ kumjuh ruh ka jingïadei ba kyrpang u kpa jong u, u P.A Sangma bad ka Mangsang. “Nga don shibun ki jingsah kynmaw ïa kane ka jaka kaba ngi shong. Nga la pynlong shibun ki jingïalang ha kane ka jaka bad katto katne na kita ki jingïalang ki dei kiba la wan shim bynta da u (L) P.A Sangma.”
U la kdew ruh ba u nongïalam ba la leit noh u ju kren bha borabor shaphang ka shnong Mangsang bad ki briew jong ka. “U (L) P. A Sangma u don ka jingsngew ba kyrpang ïa ka shnong Mangsang bad bunsien u kren shaphang kane ka jaka bad ki nongshong shnong jong ka. Namar kata ka long kaba myntoi ba ha ka jingdap 10 snem ka lyngkhuh sngi ïap jong u la ïoh ban buh maw nongrim na ka bynta ban pynbha ïa ka Stadium kaba u la sdang ban shna ha ka por ba u dang im.”
U Conrad haba kren halor ka Mangsang PHC u la ïathuh ba la dep ban mang ïa ka jinglut na ka bynta ban pynbha ïa katei ka jaka ai jingsumar bad ka projek ba kongsan ka long ban tei ïa ki jaka sah ki nongtrei, ka jaka sah ki GNM bad kawei ha kamra na ka bynta ban long kino-kino ki jingïalang, kine ki jingpynbha ki thmu ban pynkhlaiñ ïa ka jingai jingshakri ha ka koit ka khiah ki paidbah nongshong shnong bad na ka bynta ki nongtrei.
Haba kren halor ka jingdonkam ki jaka ai jingai jingsumar ha ki thaiñ nongkyndong, u Conrad u la ong ba ka Sorkar ka don ïa ka thong bad buh ha khmat eh ban ai ki jaka sumar kiba paka ha kim thaiñ nongkyndong.
U la jubab ïa ki jingeh ki nongïalam shnong, u la ong ba ka Fire and Emergency Services na ka bynta ka thain kan sa treikam noh shen bad ka jingdawa ban ïoh noh ka Block ba thymmai u la kular ban pynlong ka jingpeit bniah.
U la pyntip ruh ba ka surok Mangsang-Adokgre kan sa ïaid shakhmat katba ka bynta ba ar jong ka jingtei kan sdang noh shen. Ka Surok Mangsang-Riangdo kaba long kum ka surok ba kongsan kaba pynïasoh ïa ka Shillong bad Guwahati ruh ka don ha ka jingpeit bniah.
Haba kyntu ïa ki samla ban shim kabu ïa ki jingthmu jong ka Sorkar, u Conrad u la pynshlur ïa ki samla ban shim ïa ki lad jingïarap bapher-bapher kiba thmu ban thaw lad bad ban kyrshan ïa ka seng kam seng jam.
