Tura, Lber 08
Da kaba kdew ïa ki jingsngewkhia kiba jur ha kaba ïadei bad ka jingshngaiñ jong ki nongkhaïi trai-ri trai-muluk na Ri-lum Garo kiba ju don bynta ha ki kam khaïi ha ki jaka khappud ka Assam, ka Achik State People’s Front (ASPF) ka la thoh sha u Myntri Rangbah ka Assam, u Himanta Biswa Sarma ban pan jingïada ïa ki.
Ha ka shithi sha u Myntri Rangbah ha ka 7 tarik Lber, ka ASPF ka la pynpaw ba ki don ki jingsngewkhia kiba nang jur ha kaba ïadei bad ki katto-katne ki jaka jong ka Assam kiba don ha khappud bad ka Meghalaya, khamtam ki distrik jong ka South Salmara, Dhubri, bad Goalpara.
“Ka la poi ha ka jingtip jong ngi ba ki dkhot jong ka jaidbynriew Garo ki la mad ïa ki jingeh kiba lah ban khanglad ïa ka jinglah jong ki ban ïashim bynta ha ka khaïi-pateng hapoh Assam. Ki khubor ki pyni ba ha Mankachar, ka kynhun ki kynthei nongdie jhur kaba leit sha Tura, ka la ïakynduh ïa ka jingeh kaba pynkhuslai ha kaba ki mar jong ki, ki la shah pynjulor ha kawei ka kynhun. Kiba kum kine ki jingjia, ki la jia ha Krishnai, Goalpara ha kaba ki nongdie jhur ki la shah thombor ha ki dkhot jong kawei ka jadbynriew,” ong ka General Secretary, ka Bernita Marak.
Ka ASPF ka la pynpaw ba ïa mynta, ki don ki jingeh ba ki nongdie ki ïakynduh bad ki khep jong ka jingshah pynthut bad la ïoh jingtip ruh halor ka jingshah kurup jong ki mar ki mata na Mankachar, Hatsingimari ha South Salmara bad na Lakhipur, Rongsai, Krishnai ha ki distrik Goalpara.
Ki la kdew shuh-shuh halor ka jingsaphriang jong ki dur-khih ha ki rynsan lad pathai kiba pynphriang ïa ki jingtip kiba bakla, kiba pynshit ïa ka jingïakynad jaidbynriew bad ka jing-isih ïa ki jaidbynriew Garo.
Ka ASPF ka la kdew ïa ka dur-khih kaba kam ba la dawa T.20,000 na ka bynta ka jingrung jong ki nongkhaïi Garo sha kine ki distrik kumjuh bad ki jingkren beiñ ki bym ïahap da ka jingthmu ban pynmong ïa ka jingsngew jong ki paidbah.
“Ngi kyntu ïa ka ophis ba donburom jong phi ban pyrkhat ha ka ban pyntreikam ïa ki lad ki lynti ban wanrah ïa ka jingshngaiñ bad ka bha ka miat jong ki ‘riew shimet na Meghalaya katba ki dang don ha Assam”, la ong ka Marak.
Ka CSO ka la tyrwa ruh ban thaw ïa u ‘Helpline’ ba kyrpang na ka bynta ban pyntip kloi halor kino-kino ki jingjia, ban pynkhlaiñ ïa ki bor pahara ha kitei ki jaka ba la kdew haneng ban wanrah ïa ka shnong suk shnong shngaiñ, ka jingpynithuh bad ban pynshitom pyrshah ïa ki ‘riew shimet kiba pynmih jingkulmar bad ki lad ki lynti kiba tyngeh pyrshah ïa ki nongpyndonkam ïa ki rynsan lad pathai kiba pynphriang ïa ka jingisih, ka jingpynjah burom bad ki jingtip ba bakla.
