Washington, Lber:
Katkum ki khubor, la ong ba u President ka United States, u Donald Trump, u la weng kam noh ia ka Secretary jong ka tnat Homeland Security jong u, ka Kristi Noem, bad ong ba un sa pynrung bujli pat da u Markwayne Mullin, ha katei ka jaka jongka.
U Trump u la pynbna ïa kane ha ki rynsan Social Media ha ka Sngi Palei, hadien ar sngi ba ka Noem ka la mad ïa ka jingshah byrngem ha Capitol Hill na ki dkhot ka GOP bad kumjuh na ki Myntri bad nongthaw aiñ.
U Trump, u iathuh pat ba un pynlong ïa ka Noem, kum ka Nonglam khubor ba kyrpang naka bynta ka Shield jong ki America, ka jingthmu ba thymmai jong ka jingïada, kaba u ong, ba kan pynleit jingmut ha ka thaiñ Sepngi.
Ka Noem, ka dei ka Secretary jong ka kynhun Myntri, kaba nyngkong eh ban mih noh ha ka samoi treikam kaba ar jong U Trump. Ka jingleit noh jong ka Noem ka pynkut noh ïa ka por ba jynjar ban peit ïa ki buit pyntreikam ïa ki nongwan buhai shnong kiba la sakhi da ki jingïakhih bad ki jingshah mudui ha ka ïingbishar.
Ka Noem, ka la mad ïa ki jingshah kynthoh, namar ba ka dang peit ïa ka jingpynshitom beiñ jong u Trump, khamtam naduh ka jingshah siat ïap jong arngut ki nongïakhih ha Minneapolis, ha ka kti jong ki ophisar jong ka tnat ba dei khmih ïa ki nongwan buhai shnong. Ka Lat barim jong ka South Dakota, ka la shah kynthoh ruh halor ka rukom ba ka tnat jongka, ka la pynlut da ki klur tyngka kaba la mang sha ka, da ka Congress.
Nalor ka jingwan buhai shnong, ka Noem ka la mad ruh ïa ka jingshah kynthoh kynthup na ki Republican, halor ka jingstet jongka jingai pisa kyrkieh ba la mynjur lyngba ka tnat pynïaid kyrkieh jong ka sorkar pdeng bad naka bynta ka jingpynkhreh jong ka sorkar u Trump ïa ki jingjia ba sngewsih.
Haba iadei pat bad utei u briew ba u Trump u la thmu ban thung bujli ha ka jaka jong ka Noem, u Mullin un donkam ban pynskhem da ka Senate, hynrei hapoh ka aiñ jong ka sorkar pdeng kaba synshar ia ki kam ba lait ha ka tnat treikam, yn shah ia u ban shakri kum u nongthoh khubor ba shipor katba ka jingpynrung kyrteng jong u ka dang sahteng.
